Debleskri gili 84 - O Debleskro Lab 2024 (Sinte-Manouche)

Miro dji nashell pal o Debleskro kheer

¹ I gili yekestar dran i familya Korah. Kay gili hi o rayeske pral i gipangre, te givell pash o bashepen ap i bashepaskri, hoy kharella Gittit.

² Tou, baro Devel oun ray pral o bolepen oun i phoub, har kamau me tiro kheer o djiyestar!

³ Miro dji nashell pal tiro kheer, baro Devel. Kamau te vap dren ap i platsa glan tiro kheer. Miro tselo djiyeha givau barhtele gilya touke, o djido Debleske.

⁴ O čirklo hatsas peske i kheer, oun o khereskro čirklo kras peske i kheer peskre čavenge, gar dour kotar, kay tou sharedo vell. Tou baro Devel oun ray pral o bolepen oun i phoub, tou hal miro baro ray oun miro Devel.

⁵ Barhteles hi kolla, kay djivenn an tiro kheer. Hako tsiro hadenn le tout.

⁶ Barhteles hi kol menshe, kolengri zoor an toute hi, oun kay o djiyestar pash tiro kheer djan.

⁷ Te djan le an o tato them, nashell kote pani lenge vin. Oun o brishin moukell lauter zenelo oun baro te vell.

⁸ Pale te pale lenn le nevi zoor, bis te dikenn le o čačo Debles ap i berga Sion.

⁹ Tou baro Devel oun ray pral o bolepen oun i phoub, shoun miro mangepen! Mouk les glan toute te vell, tou o Yakobeskro Devel!

¹⁰ Dik lačes ap o baro rayeste, koles menge ap mari rig čival! Dik ap leste, koles vin rodal, te vell lo maro ray!

¹¹ Yek dives ap i platsa glan tiro kheer hi feteder har i zerya vavar divessa. Me kamau boudeder te vap tardo pash o voudar glan tiro kheer, har te djivap pash i čilačende.

¹² Maro baro Devel hi o kham maro djipaske. Yob rikrell peskre vasta pral mende. O baro Devel dell men lačepen oun raylepen. Kolen, kay o djiyestar ap leste shounenna, dell lo hako lačepen, hoy len hounte vella.

¹³ Tou baro Devel oun ray pral o bolepen oun i phoub, barhtelo hi ko mensho, kay rikrell pes ap toute.