Debleskri gili 83 - O Debleskro Lab 2024 (Sinte-Manouche)

Mo Devel, koure tout kolentsa, kay kamenn o Israelengro them penge te lell

¹ I gili o Asafestar.

² Miro Devel, rake! Mouk tout te shounell! Ma ač pokones!

³ Dik! Kolla, kay rhoyrenn pen ap toute, hi divyo. Kolla, kay kamenn touke čilačepen, hadenn pengro shero pral toute.

⁴ Yon čivenn pen khetne oun rakrenn, har nay krenn le tire menshenge čilačepen. Pal o doumo krenn le vin, te djan le ap kolende, kay khatrenn pen pash toute.

⁵ “Avenn”, penenn le, “Stakras len khetne, kol Israelitaryen! Kal menshenge hi kek platsa ap kay phoub. Ko lab Israel hounte vell bistedo!”

⁶ Yon hi yek dji oun yek djipen oun kran vin, te djan le ap toute:

⁷ Kolla hi i menshe dran o Edom oun dran o Ismael, dran o Moab, dran i Hagar,

⁸ dran o Gebal, o Ammon, oun o Amalek, ninna i Filistarya oun kol menshe dran o foro Tirus.

⁹ Ninna o Assour čivas pes ap lengri rig. Yon van yek moussi i menshentsa, kay venna pal o Lot.

¹⁰ Miro Devel, kre lenge, har kral ap i Midianarya, ap o Sisera, oun ap o Yabin pash ko tikno pani Kishon.

¹¹ Kolla van moulo dino pash En-Dor, oun ačan koy čiddo, oun van čik.

¹² Kre lengre pralstunenge har kral kol morshentsa o Oreb oun o Seeb. Ap lengre tsele rayende kre yaake har kral ap o Zeba oun o Zalmunna.

¹³ Kolla penan: “Mer kamah o Debleskro them menge te lell.”

¹⁴ Miro Devel, phourde len krik har patria, har phouss an i baro dourho!

¹⁵ Ab lenge har i yag, hoy o veesh tele rhačrell, oun pes an i berge doureder rhal!

¹⁶ Biče i baro phourdepen oun trade len krik! Kre lenge daar tiro zorelo dourheha!

¹⁷ Kre, te venn lengre sherya lolo i ladjatar, te poučenn le pal toute, baro Devel.

¹⁸ An ladj oun traash ap lende hako tsireske, te merenn le an i ladj.

¹⁹ Mou dikenn le, te hal tou kokres o baro Devel oun o pralstouno ray ap i tseli phoub.