Debleskri gili 81 - O Debleskro Lab 2024 (Sinte-Manouche)

I gili o Debleske, te givell ap kol bare divessa

¹ I gili o rayeske pral i gipangre, te givell ap i bashepaskri, hoy kharella gittit. O Asaf kras kay gili.

² Givenn i barhtyatar o Debleske! Yob hi mari zoor. Sharenn o Yakobeskro Debles!

³ Givenn leske Debleskre gilya! Denn ap i pauka! Bashrenn ap i doryengre bashepangre!

⁴ Phourdenn an i phourdepaskri ap ko dives, kay vell o čon pale diklo, ninna ap ko dives, kay vell o tselo čon diklo. Kova hi o baro dives, kay vah barhteles khetne.

⁵ Ap kava lab hounte rikrenn pen i Israelitarya. Kava hi i čačepaskro lab, hoy o Yakobeskro Devel lende das.

⁶ Kova penas o Devel o Yosefeskre menshenge, har djas lo an o kourepen khatar i Egiptarya. Shounau i rakepen, hoy me gar prindjrom:

⁷ Me lom t'mendar ko pharo koova tele, hoy ap t'mare phika his, oun t'mare vasta hounte hidjrenn bouder gar kol phare barra.

⁸ Har touke ropaske his, oun tou pal mande gole dal, vom me oun lom tout vin. Tou poučal mandar, oun me rakrom touha dran koy folka. Pash o pani Meriba lom tout an i yak, te dikap, har tou shouneh ap mande.

⁹ Mire menshe, shounenn ap mande, me dau t'men trad. Israel, shouness, hoy me touke penau:

¹⁰ Pash t'mende hounte vell kek vavar devel, oun tou mangess kek vavar debles an!

¹¹ Me hom tiro baro Devel, kay tout dran o them Egiptia vin anas. Kre tiro mouy dour pre, oun me dau tout boud rhapen.

¹² Mire menshe shounan gar ap mande. O Israel kamas man gar.

¹³ Yaake moukom len kova te krell, hoy yon kaman, oun moukom len pal pengro shero te djal.

¹⁴ Har kamoms me, te shounans mire menshe ap mande, te djals o Israel ap miro drom!

¹⁵ Sik anoms ladj ap kolende, kay ap lende djan, oun čivoms miro vast phares ap lende.

¹⁶ Kolla, kay pen ap o baro Debleste rhoyrenn, hounte vitsrens pen tele glan leste. Lengri phagi ačals hako tsireske.

¹⁷ Oun i Israelende doms o lačeder djob rhapaske, oun o feteder gvin, te vans le čalo.