Debleskri gili 80 - O Debleskro Lab 2024 (Sinte-Manouche)O Israel hi har i drakengro rouk 1 I gili o rayeske pral i gipangre, te givell pash o bashepen ap i shob-doryengri bashepaskri. Kay gili kras o Asaf. 2 Shoun ap mende, tou, kay deh yak ap i Israelende. Har i bakrengro yak dell ap peskre bakre, deh tou yak ap o Yosefeskre čavende. Tou, kay hal beshdo pral i keroubim, ab, oun sike tout 3 glan tire menshende dran o kheer Efrayim, Benyamin oun Manasse! Sike tiri bari zoor oun ab ap mari rig! 4 Baro Devel, hade men pale pre! Dik lačes ap mende, yaake djal menge pale mishto. 5 Tou, baro Devel oun ray pral o bolepen oun i phoub, har rah kameh tou mentsa rhoyedo te vell, kanna, kay tire menshe tout an-mangenn? 6 I sva hi maro rhapen, dran i khoro pherde sva deh tou men te piyell. 7 Kolla, kay troul mende djivenna, čingrenn pen pral maro them. Kolla, kay kamenn men krik te tradell, praasenn men. 8 Tou, Devel oun ray pral o bolepen oun i phoub, hade men pale pre! Dik lačes ap mende, yaake djal menge pale mishto. 9 Dran o them Egiptia anal tou i drakengro rouk; tradal vavar menshen dran lengre themma, oun čival les an i phoub. 10 Tou kral leske boud platsa, leskre draba nay djan dour an i phoub, oun yob vas bourhlo an o tselo them. 11 Peskre kashtentsa čakras lo i berge. Leskre lengste kashta čakran i bare cedertikre rouka. 12 Leskre moussya djan bis pash o baro pani ap koy yek rig, oun bis pash ko zorelo lengsto pani ap koy vavar rig. 13 Hoske phagal tou kol barra tele, hoy troul leste pre-čiddo van? Kanna nay lell hakeno peske drake lestar tele, kay kote djal. 14 I divye bale rhan les pre, oun divye firhe moukenn či pral. 15 Ab pale pash mende, tou, o Devel pral o bolepen oun i phoub! Dik dran o bolepen ap mende, oun de pale yak ap tiro drakengro rouk! 16 Rike tiro vast pral leste, hoy tou an i phoub čival, pral ko terno drakengro rouk, hoy tou bares oun zoreles kral. 17 Dik, har hi lo tele dino oun pre-rhačedo! Činge yaake ap kolende, kay kova kran, te phagenn le khetne. 18 Rike tiro vast pral koleste, kay hi beshdo ap tiri čači rig, pral ko morsheste, koles tou zoreles kral. 19 Yaake kamah mer gar tiri rigyatar te djal. Mouk men te djivell! Oun mer dah tiro lab an-gole. 20 Tou, baro Devel oun ray pral o bolepen oun i phoub, hade men pale pre! Dik lačes ap mende, yaake djal menge pale mishto! |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.