Debleskri gili 79 - O Debleskro Lab 2024 (Sinte-Manouche)I mangepen o Debleskre menshendar an o tsiro, kay kourepen hi 1 I gili, hoy o Asaf kras. 1 I gili, hoy o Asaf kras. Maro Devel, menshe dran vavar themma peran an tiro them dren; tiro kheer, hoy touke kokres his, kran le pale-čiddo. Oun o foro Yerusalem dan le paash. 2 Tire boudepangren dan le moulo, oun lengro mass dan le i čirklende tel o bolepen te rhal. Kolen, kay tou touke vi-rodal, maran le, oun lengro mass dan le i divye firhen te rhal. 3 Lengro rat nashas har pani troul o foro Yerusalem, oun kek his koy, kay len paskras. 4 Mer ham praasedo kolenge, kay troul mende djivenn, ham lenge sapaske, oun yon rikrenn men dineleske. 5 Baro Devel, har rah ačell tiri rholi ap mende? Har rah rhačrell li har i yag? 6 Čore tiri rholi ap kol menshende vin, kay tout gar prindjrenna, ap kol themma, kay tout gar an-gole denna! 7 Yon rhan o Yakobes pre, oun stakran leskro them paash. 8 De men kek phagi koleske, hoy mare phoure kran! Kre sik tiro dji menge pre! Dik, men hi bouder kek zoor! 9 Ab ap mari rig, maro Devel! oun le men vin! Le men vin dran lengre vasta, te vell tiro lab hadedo! Oun le mari doosh mendar krik, te vell tiro lab pale baro! 10 Hoske nay penenn i vavar menshe: Kay hi t'maro Devel? Mouk men te dikell, har tou len khetne stakreh koleske, kay maran le tire boudepangre! 11 Shoun, har i stilde rovenn! Tou hal yaake zorelo, rike kolen ap o djipen, kay hi yaake mishto har moulo. 12 Kolla, kay an i themma troul mende djivenn, praasan tout, maro rayes. De len kova efta kope pale, hoy kran le ap toute! 13 Mer ham tire menshe. Tou hal menge har i bakrengro, kay anell peskre bakre kote, kay hatsenn le rhapaske. Mer parkrah men pash toute hako tsiro, oun sharah tout kanna oun an ko tsiro, hoy vella. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.