Debleskri gili 78 - O Debleskro Lab 2024 (Sinte-Manouche)

Ma biste, hoy o Devel ap o Israel kras

1 Givede laba o Asafestar.

¹ Givede laba o Asafestar. Mire menshale, shounenn, hoy t'menge penau! Shounenn mishto ap mire laba!

² Me kamau te rakrap i goseve labentsa pral i phoure tsirya.

³ Kova, hoy mer shounam oun djinah, oun hoy mare phoure menge penan,

⁴ kova kamah gar te khatrell glan mare čavende; na-a, kolenge, kay pal mende venna, kamah te penell, har zorelo o baro Devel hi oun havo baro koova yob kras an peskri zoor.

⁵ Yob sikras o Yakobeskre čavende, har te djivenn le. Oun sikras i Israelende peskro drom. Mare phourenge penas lo, te sikrenn yon pengre čavende, har te djan le leskro drom.

⁶ Yaake te djinenn les kolla, kay pal lende venna, kolla, kay gomme gar bolde hi. Yon ninna sikrenn o Debleskro drom pengre čavende,

⁷ yaake te rikrenn yon pengro tselo djiyeha ap o Debleste, oun bistrenn gar, hoy o Devel lauter kras, oun rikrenn lauter, hoy yob penas,

⁸ yaake te venn le gar har pengre phoure, kay o Debleskro dromestar tele peran, oun kaman gar te shounell. Kolengre djia his gar zorelo, oun yon his gar pengro tselo djiyeha pash o Debleste.

⁹ Yaake his i morsha dran o kheer Efrayim: Ninna le hayvan le mishto o bogeha trouyel te djal, nashan le penge ap o dives, kay o kourepen hi.

¹⁰ Yon rikran pen gar ap o Debleskre laba, hoy yob lentsa vin kras, oun kaman gar ap leskro drom te djal.

¹¹ Yon bistran, hoy yob lauter kras, – ko tselo baro koova, hoy yob ap lende kras oun hoy kek vavar nay krella.

¹² Glan lengre phourende kras yob baro zorelo koova an o them Egiptia, pash o foro Soan.

¹³ Yob kras i drom an o baro pani, oun moukas len mashkral ap i vavar rig te djal. Ap kol douy rigya his o pani pral tardo har i kheer.

¹⁴ Ap o dives djas lo glan lende an i folka, oun rati an i yag, te vas len i momeli.

¹⁵ An o moulo tato them phagas lo bare barra, oun das len pani te piyell, boudeder har doha hakeneske.

¹⁶ Yob moukas panya te vell dran i bare barra, te nashan le tele har bare lengste panya.

¹⁷ Ninna te kras lo kova lauter lenge, shounan le gar ap leste, oun an o moulo tato them hadan le pen ap leste, ko pralstuneste.

¹⁸ An pengre djia patsan le gar, te nay dals len o Devel ko rhapen, pal kova len bok his.

¹⁹ Oun yon rakran pal o Debleste oun penan: “Nay dell men o Devel rhapen kate an o moulo tato them?

²⁰ Kova hi čačo: Yob phagas o baro bar, oun boud pani vas vin oun nashas tele kate te kote pral o them. Nay dell lo men ninna maro? Hayvell lo peskre menshenge mass te anell?”

²¹ Har o baro Devel kova shounas, vas lo rhoyedo ap o Yakobeskre čavende. Peskri rholi vas ap o Israel har i yag.

²² Yon patsan gar, te hi lengro Devel ap lengri rig, oun dikan gar ap leste, te dell lo len, hoy len hounte vell.

²³ Oun yob rakras zoreles ap i volke oun kras i bolepaskre voudya pre,

²⁴ oun das len bolepaskro djob te rhal, hoy kharell Manna. Kova peras tele ap lende, har brishin tele perell ap i phoub.

²⁵ Ava, maro, hoy i bolepangre rhan, das lo lende lauterende. Boud rhapen das lo len oun kras len čalo.

²⁶ Yob bičras i baro dourho, hoy phourdas kotar, kay o kham pre djal. Oun peskri zoryah tradas lo i vavar dourho pash lende, hoy phourdas kotar, kay o kham pralstounes hi,

²⁷ Oun o dourho anas boud boud čirklen peha, te vell len mass te rhal, yaake boud čirkle har i santa pash o baro pani.

²⁸ Mashkral ap i platsa peran le, kote, kay lengre plarhtene khera tardo hi.

²⁹ Kote das lo len, hoy yon kaman, oun yon rhan oun van čalo,

³⁰ Har his le gomme pash o rhapen oun mass an lengro mouy,

³¹ koy vas o Debleskri rholi pral lende, oun yob maras lengre pralstunen, oun i terne zorele morshen i Israelendar moukas lo te merell.

³² Ninna te dikan le kova lauter, anan le pale te pale doosh ap pende, oun patsan gar ap lauter, hoy kras yob an peskri bari zoor.

³³ Koy kras lo, te djal lengro djipen sik trouyel, oun lengre bersha his pherdi daar.

³⁴ Te anas lo o merepen pral lende, rodan le o Debles, oun poučan pale pal leste.

³⁵ Oun lenge vas an o shero, te hi o Devel kova, kay rikrell len, oun kay yob, o Devel pral halauter, kova hi, kay len vin lell dran o merepen.

³⁶ Kova, hoy le leske penan, his rhorhedo. oun lengre laba his rhorhepen.

³⁷ Pengre djiyentsa his le gar pash leste, oun ap leskre laba, hoy le leha vin kran, rikran le gar pengro tselo djiyeha.

³⁸ Yob kras lenge peskro dji pre, oun maras len gar. Na-a, yob las lendar i doosh tele. Boud kope rikras yob peskri rholi pale, oun moukas gar peskri tseli rholi ap lende te vell.

³⁹ Yob djinas, te hi le menshe, kay hounte merenn, oun hi sik bouder gar koy, yaake har i dourho, hoy djal oun gar pale vella.

⁴⁰ Boud kope hadan le pen ap leste an o moulo tato them, oun doukran leskro dji.

⁴¹ Pale te pale kaman le te dikell, hoy yob hayvella. Yaake dan le leske an o dji, koleske, kay kokres o čačo Devel hi, o Devel pral o Israel.

⁴² Yon bistran leskri bari zoor oun ko dives, har las lo len vin dran i čilače vasta.

⁴³ Lenge vas gar an o shero, har sikras lo peskri bari zoor an o them Egiptia, oun havo baro koova yob kras pash o foro Soan.

⁴⁴ Kote kras lo, te vas o pani an o Nil rat, te nay piyan i Egiptarya gar dran pengre panya.

⁴⁵ Oun yob bičras matsille an lengro them, hoy len dandran, oun djambe, hoy o them khandlo kran.

⁴⁶ Lengro djob rhan i stepangre pre. Kolla rhan lauter, hoy ap lengri phoub bares vas.

⁴⁷ Oun lengre drakengre rouka das i barrengro brishin paash, oun lengre faygetikre rouka o djayedo pani.

⁴⁸ I brishineskre barra dan lengre groumyen moulo, oun koy yag, hoy pral oun tele djas ap o bolepen, das i bakren moulo.

⁴⁹ Yaake bičras o Devel peskri bari rholi ap i Egiptarya. Leskri rholi his har i yag, hoy rhačras, oun i bari phagi pral lende anas. I bibarht tapras len har te vals lat bičedo i bolepangrendar, kay anenn o merepen.

⁵⁰ Oun o Devel rikras peskri rholi gar pale, oun las len gar vin dran o merepen, oun moukas len te merell ap i djoungelo nasslepen.

⁵¹ Yob maras i tsele phoureder morsh čaven an o them Egiptia, kol čaven kolendar, kay venna pal o Ham, an kolende pengre dadengri bareder zoor hi.

⁵² Palle anas yob peskre menshen vin, oun djas glan lende har i bakrengro djal glan peskre bakre, oun sikras len o drom an o moulo tato them.

⁵³ Yob rikras peskre vasta pral lende. Oun len hounte vas kek daar. Oun kolla, kay len palla lan, an o baro pani yon tassan.

⁵⁴ Yob anas len an o them, hoy yob peske vi-rodas, pash kay berga, hoy yob peskri zoryah dren las.

⁵⁵ Yob tradas i tsele vavar menshen glan lende vin, oun das lengro them peskre menshende, hakeneste kol deesh-te-douy bare familyendar das lo lengro kotar, te vell ko them lengro. An i plarhtene khera kol vavar menshendar moukas lo i Israelitaryen te djivell.

⁵⁶ Kolla hadan pen pale te pale ap o Debleste, ko pralstuneste, oun kaman gar ap leste te shounell, oun rikran gar leskre laba.

⁵⁷ Yon peran lestar tele. Oun yaake har lengre phoure menshe kran, kran yon ninna, oun kaman o Deblestar bouder či te djinell. Či-moldo his le har i bogo, koleskri dori bouder gar zorelo hi.

⁵⁸ Yon mangan i vavarengre deblen an. Oun rhoyran o Debles, har kran le penge rhorhene deblen.

⁵⁹ Har o Devel kova shounas, vas lo yaake rhoyedo, te das lo o Israel pre.

⁶⁰ Oun yob moukas peskro kheer an o foro Shilo, kote, kay yob mank peskre menshende djivas.

⁶¹ Oun ko sonakaskro morhton, hoy sikras peskri zoor oun peskro raylepen, moukas lo an i vasta kolendar te perell, kay kouran pen peskre menshentsa.

⁶² Oun peskre menshen das yob an lengre vasta, te marenn le len o rhareha. Yaake rhoyedo his lo ap lende.

⁶³ I terne morshen rhas i yag. Oun i terne ča nay hatsan bouder kek romes.

⁶⁴ I rashaya van maredo o rhareha, oun lengre romya nay rovan gar pral pengre moule romende.

⁶⁵ Koy stas o baro Devel pre, har yek, kay sovas oun pre djangras. Zorelo his lo har yek, kay pash i pipen barhtelo vas.

⁶⁶ Oun yob das kolen, kay kouran pen peskre menshentsa oun tradas len pale. Lengri ladj ačas hako tsireske ap lende.

⁶⁷ O Yosefeskre čaven las yob gar, te venn lendar i pralstoune pral o Israel, vitar gar rodas lo peske i menshen dran o kheer Efrayim vin.

⁶⁸ Na-a, i menshen dran o kheer Youda rodas lo peske vin, oun koy berga Sion, hoy yob o djiyestar kamella.

⁶⁹ Kote pre čivas lo peskro kheer, dour pral djal lo pre – har o bolepen, oun hi zoreles tardo har i phoub, hoy lo kras hako tsireske.

⁷⁰ Oun yob rodas peske o Davides vin, te vas lo leskro boudepaskro, oun las les kotar krik, kay das lo yak ap i bakrende.

⁷¹ Kolendar kharas lo les krik, te vell lo o baro ray pral o Israel, te dell lo yak ap o Debleskre menshende, har i bakrengro dell yak ap peskre bakrende.

⁷² Oun peskro tselo djiyeha das o David yak ap lende, oun gosvepah sikras lo len o drom.