Debleskri gili 77 - O Debleskro Lab 2024 (Sinte-Manouche)An o pharo tsiro bistrau gar o lačo koova, hoy o Devel kras 1 I gili o rayeske pral i gipangre, o Yedoutoun. Kay gili kras o Asaf. 2 Me dau gole ap miro Debleste, dau bari gole ap leste. Ava, ap o Debleste dau gole, bis te shounell lo man. 3 An miri bari daar rodom me o baro Debles. Rati rikrom miro vast pre pash leste oun moukom gar tele. Miro dji rovas oun kamas gar tele te moukell. 4 Har djas mange o Devel an o shero, phagas miro dji. Har rakrom miro djiyeha, van mange i sva. 5 Mire yaka rikral tou pre, yaake te nay sovom me gar. Me djinom gar doureder, oun man his bouder kek laba. 6 Mange vas o phouro tsiro an o shero, kol bersha, hoy glan i rah tsiro his, stan an mande pre. 7 Rati djas mange boud an o shero trouyel, rakrom miro djiyeha oun rodom te hayvap: 8 Bistras o baro Devel men hako tsireske? Vell lo menge bouder gar lačo? 9 Hi leskro lačepen menge gar bouder koy? Las yob peskro lab pale? 10 Krell o Devel bouder gar peskro dji menge pre? Hi lo yaake rhoyedo, te pandas lo peskro dji menge? 11 Kote penom me: Kava hi miro nasslepen, te kras pes o Devel vavarčandes. I zoor o pralstunestar vell bouder gar diklo. 12 Kanna moukau mange kova an miro shero te djal, hoy tou, baro Devel, kral, ava, penau mange ko baro oun zorelo koova, hoy kral an tiri bari zoor. 13 Oun rakrau miro djiyeha pral kova lauter, hoy tou kral, pale te pale penau mange kova. 14 Miro Devel, halauter, hoy tou kreh, hi čačo. Kek vavar devel hi yaake zorelo har tou. 15 Tou hal ko Devel, kay savo baro koova krell, hoy kek vavar nay krella. Tou sikral tiri bari zoor pash i menshende an vavar themma. 16 Tiri zoryah lal tou tire menshen vin dran lende. Ava, kolla, kay van pal o Yakob oun pal o Yosef lal tou vin. 17 I bare panya dikan tout, mo Devel. Har dikan le tout, tapras len i daar, oun yon trissan. Ninna an o telstunepen vas o pani divyo. 18 Dran o bolepen das baro zorelo brishin. O bolepen das bari gole, oun i yag das karye ap o bolepen kate oun kote. 19 Tou kral bari gole ap o bolepen. Koy yag ap o bolepen kras i rat har te vals dives. I phoub trissas i daryatar. 20 Tou djal mashkral o baro pani. Tire herya djan an o telstouno pani. Oun kek nay dikas, kay tire herya stakran. 21 Tou djal glan tire menshende yaake har i bakrengro djal glan peskre bakrende, oun rodal o Moses oun o Arones vin, te djan le glan lende ap o drom. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.