Debleskri gili 74 - O Debleskro Lab 2024 (Sinte-Manouche)O mangepen yekestar, kay dikas, har o Debleskro baro kheer paash dino vas 1 Givede laba o Asafestar. 1 Givede laba o Asafestar. Maro Devel, hoske čival tou men pale hako tsireske? Hoske hal tou yaake rhoyedo pral mende? Tou hal maro bakrengro, oun mer ham tire bakre! 2 Ma biste gar, te ham kol menshe, kay tou touke glan i rah tsiro vi-rodal. Tou ginal men vin dran i vasta kolendar, kay men tele rikran. Tou kamal, te vas mer tiro. Ma biste i berga Sion, hoy touke vi-rodal, te djivess kote. 3 Ab kay oun dik kol barra čiddo, hoy tiro kheer his. Halauter hi paash dino kolendar, kay hadan pen pral toute. 4 Bari gole dan le an tiro kheer, oun čivan kol plarhte pre, hoy sikrenn, te hi yon i zorleder. 5 Mer dikam, har hadan le pengro tover, har te dans le kasht tiknes an o veesh. 6 Ko tselo kouč koova, hoy dran o kasht vi-činlo vas, dan le paash. Pengro tover oun o saster dan le dren. 7 Tiro raylo kheer rhačran le tele. Ko kheer, kay tou khere hals, kran le pale-čiddo, 8 oun penan penge an pengre djia: “Kras lenge yaake, te ačell lendar bouder či.” An o tselo them rhačran le o Debleskre khera tele. 9 Kek sikepen hi bouder kay, hoy men sikrell, te hal tou pash mende. Kek Debleskro rakepaskro hi bouder kay. Oun kek djinella, har rah kova yaake ačell. 10 Miro Devel, har rah moukeh tou len pal toute te sal? Moukeh tou len hako tsiro tiro lab te praasell? 11 Har rah rikreh tou tout pale, oun sikreh len gar tiro vast? 12 Miro Devel, foun tiknes pre hal miro baro ray. Toutar vell, te venn i menshe vin lino dran i bibarht. 13 Tiri bari zoryah phagal o baro pani pre, stakral i sherya kol bare panyeskre sapendar dren. 14 Tou stakral i sherya ko baro firhestar Leviatan paash, oun dal leskro mass i divye firhenge te rhal. 15 Tou moukal pani te nashell, kay kek his. Oun kote, kay zorele panya nashan, hi le kanna bouder gar koy. 16 Tiro hi o dives, oun tiro hi i rat. Tou dal o kham oun o čon pengro drom, kay te djan le. 17 Tou penal, har baro i phoub te vell. I niyal oun o vend kral tou. 18 Kanna, baro Devel, mouk touke an o shero te vell, har praasenn tout kolla, kay hadan pen pral toute. Dik, har dinele menshe tiro lab an i čik tserdenna. 19 Mer ham har i tikno čirklo. De men gar i divye firhen te rhal! Ma biste men gar hako tsireske, men, tire menshen, kay palla lino venn! 20 Biste gar koy sovel, hoy tou men dal, te rikreh tou pash mende! An o tselo them vell djoungelo oun čilačo koova kerdo an o khatepen. 21 Ma mouk kolen i ladjah penge te djal, kay palla lino hi! Kre, te sharenn i čorvele oun tikne tiro lab! 22 Ste pre, miro Devel, oun kre o čačepen vin! Dik ko praasepen, koleha tout kol dinele hako dives praasenna. 23 Ma biste gar koy bari gole kolendar, kay hadan pen pral toute! Shoun, har divyo yon hi! Lengri gole vell bareder oun bareder. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.