Debleskri gili 73 - O Debleskro Lab 2024 (Sinte-Manouche)

O Devel hi pash mande, ninna te djal i čilačenge feteder har mange

1 I gili, hoy o Asaf kras.

¹ I gili, hoy o Asaf kras. O Devel hi lačo ap o Israel, ap lauterende, kolen i djoudjo dji hi.

² Vals sik, kay peroms o Debleskro dromestar tele. Mire herya his bouder gar zoreles tardo,

³ har dikom, te djal i čilačenge yaake mishto. Me zilverom ap kolende, kay krenn pen baro.

⁴ Kek douka hi len, sasto oun pesso hi le.

⁵ Lenge djal gar djoungeles har i vavar menshenge. Yon hounte marenn pen gar tele har i vavar menshe.

⁶ Doleske hi le pre-phourdo, Lengro sharepen hi har i verkli troul i meen. Oun lengro čilačo koova hi lengro ripen.

⁷ Dran lengre djia vell čilačepen. Oun yon krenn lauter pal pengro shero.

⁸ Lenge hi či moldo. Yon rakrenn pral lauter čilačes. Bare labentsa rikrenn le i menshen tele.

⁹ Yon krenn pengro mouy pre, te čingrenn le ap o bolepen. Oun hoy le penenn, hounte vell kerdo ap i phoub.

¹⁰ Doleske nashenn lenge leskre menshe palla, oun piyenn lengre laba har pani.

¹¹ Yon penenna: “Har shounell nay o Devel kava? Har hayvell lo kova, yob, kay pral an o bolepen hi?”

¹² Yaake hi kol čilače. Len hi i shoukar djipen. Bravleder oun bravleder venn le.

¹³ His kova čičeske, kay rikrom miro dji djoudjo, oun anom kek doosh ap mande?

¹⁴ Man hi douka hako dives, haki tsalla hayvau tire dava.

¹⁵ Te penoms me: Kamau ninna yaake te rakrell har yon, palle phoukroms o Debleskre čaven.

¹⁶ Koy lom mange tsiro, te nay hayvap kava, oun phares his kova an mire yaka,

¹⁷ bis te djom an o Debleskro kheer. Kote hayvom, hoy ap lende vella:

¹⁸ Čačepah, tou čival len ap i sapeni phoub, kay hounte perenn le.

¹⁹ Ap yek kopo hi le bouder gar koy. Lengro merepen nay vals gar djoungleder!

²⁰ Yon hi har i souni, hoy yek bistrell, te stell lo pre. Yaake bistreh tou len ap ko tsiro, kay hadeh tout tou, baro Devel.

²¹ Har doukas man an miro dji, oun čourye das an mire bouke,

²² koy homs dinelo oun hayvom či. Ava, dinleder har i firho homs glan toute.

²³ Kanna ačau hako tsiro pash toute. Tou rikreh man pash miro čačo vast.

²⁴ Tou aneh man ap ko drom, hoy tout mange hi. Oun pal miro djipen ap kay phoub leh tou man pash toute an tiro raylepen.

²⁵ Te hi man tout, poučau či pal o bolepen, oun vitar gar pal i phoub.

²⁶ Te djal i zoor peske dran mande, oun miro dji bouder gar zorelo hi, palle ačeh tou, miro Devel, hako tsiro miri zoor oun miro bravlepen.

²⁷ Koon toutar krik djal, djal tele. Oun koon moukell tout, koles aneh an o moulengro them.

²⁸ Mange hi mishto, te rikrap man ap miro Debleste. Te vap pash toute, miro ray, baro Devel, kova hi miri barht, te rakrap halauterestar, hoy tou kral.