Debleskri gili 72 - O Debleskro Lab 2024 (Sinte-Manouche)O baro ray mangell o Deblestar leskri barht 1 I gili o Salomestar. 1 I gili o Salomestar. Mo Devel, de tiro čačepen o baro rayeste an o dji, te rakrell lo o čačepen yaake har tou o čačepen rakrals. 2 Kre lestar i čačepaskro ray, kay dell koles o čačepen, kones čačo hi, ninna te hi lo čorvelo. 3 Kote, kay yob o baro ray hi, djivenn i menshe i lačo djipen o Debleha, oun čačepen vell an o tselo them, ninna ap peskre tikne oun bare berge. 4 O baro ray mou rakrell i čorvelenge mishto, oun vell ap i rig kolendar, kay tele rikedo venn, oun stakrell kolen khetne, kay len doukrenna. 5 Mouk les te djivell yaake rah har o kham oun o čon ap o bolepen hi, oun yaake rah har menshe ap i phoub hi! 6 Mouk les te vell har o brishin, hoy perell ap i phoub, har o pani, hoy krell o them sapeno. 7 Palle djal mishto kolenge, kay an o čačepen tardo hi. Oun i menshe djivenn lačes khetne, bis te o čon bouder gar koy hi. 8 Oun yob vell o baro ray pral i tsele themma, foun yek baro pani bis pash o vavar baro pani. 9 Glan leste moukenn pen kolla tele te perell, kay an o moulo tato them djivenna. Oun kolla, kay les gar kamenna, hounte čivenn pen glan leste an i čik. 10 I bare raya, kay djivenn an o foro Tarsis oun an i panyeskre themma, kolla anenn leske kouč koova. Ninna i bare raya pral i forya Saba oun Seba bičrenn leske shoukar koova. 11 I tsele bare raya perenn tele ap i phoub glan leste. Oun i tsele natsyone boudrenn leske. 12 Yob hi kova, kay shounell o čorveles, kay dell gole, oun lell les dran i bibarht vin, oun vell ap i rig kolestar, kones kek hi, hoy leske koy hi. 13 Kolen, kay kek zoor hi oun kolla, kay čorvelo hi, ap kolende hi lo lačo oun dell yak, te ačenn le djido. 14 Yob lell len vin dran o vast kolendar, kay lenge o djipen phares kran. Oun kolendar, kay len dava dan, lell lo len krik. Lengro djipen hi leske boud moldo. 15 Rah djivell o baro ray! Denn les o sonakay dran o them Saba! Mangenn leske lačepen o Deblestar hako tsiro! Rakrenn o Debleskri barht vin pral leste hako dives! 16 An o them mouk boud djob bares te vell, te hi lo tardo bis pral ap i berge, yaake har o veesh ap i berga Libanon. An i forya mou venn yaake boud menshe har o zenlepen ap o them! 17 Leskro lab mou ačell hako tsireske. Yaake rah har o kham ap o bolepen hi, mou vell leskro lab sharedo! Lestar mou vell lačepen ap i menshende an i tsele themma. Oun yon te rakrenn i barht pral leste vin. 18 Sharas o baro Debles, ko Debles pral o Israel. Yob kokres krell baro oun zorelo koova! 19 Sharas leskro baro raylo lab hako tsiro! Leskro raylepen mou vell diklo an i tsele themma! Amen, yaake te vell kova! 20 Kate herenn pre o Davideskre gilya, kolentsa yob o Debles an-mangas. O Davideskro dad his o Isay. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.