Debleskri gili 71 - O Debleskro Lab 2024 (Sinte-Manouche)Kanna, kay phouro hom, ma mouk mandar! 1 Baro Devel, me rikrau man ap toute. Mouk man gar čičeske pash toute te vell! 2 Tou kreh, hoy čačo hi. Doleske ab tou ap miri rig oun le man vin dran i čilače vasta! Shoun miri gole oun rike man! 3 Ab mange har i baro zorelo bar, pash koleste nay nashau oun man khatrau! Tou dal tiro lab, te vess ap miri rig. Tou hal mange har i baro zorelo kheer ap i barreskri berga, kay nay khatrau man. 4 Miro Devel, le man vin dran i vasta i čilačendar, oun kolendar, kay o čačepen stakrenna, oun i vavaren i zoryah tele rikrenna. 5 Miro ray, tou baro Devel, ap toute dikau, foun tiknes pre patsom ap toute. 6 Miro tselo djipen rikrom man ap toute. Yaake rah har boldo vom, rikral tou tire vasta pral mande. Tout kamau me te sharell hako dives. 7 Ninna te patsenn boud, kay praasal tou man, hal tou mange har i zorelo kheer, kay nay khatrau man. 8 O tselo dives kamau te sharap tout oun givap touke gilya. 9 Kanna, kay phouro hom, ma mouk mandar! Ma dja mandar kanna, kay hi bouder kek zoor an mande! 10 Kolla, kay mange čilačepen kamenn, rakrenn pal mande. Kolla, hoy kamenn mange o djipen te lell, rakrenn khetne, 11 oun penenn: “O Devel djas peske lestar. Las les palla oun tapras les! Kek hi koy, kay les dran mare vasta vin lell.” 12 Miro Devel, ab gar dour mandar! Kre sik, oun ab ap miri rig! 13 Mou venn le tele vitsedo oun merenn, kolla, kay mange o čilačepen kamenn. Praasepen oun ladj mou vell ap kolende, kay kamenn miri bibarht. 14 Me dikau hako tsiro ap toute oun sharau tout boud oun boudeder. 15 Me penau i vavarenge, har čačo tire dromma hi. Hako dives rakrau pral o lačepen, hoy tou lauter kral. Kova hi boudeder har nay hayvau. 16 Me vau oun rakrau pral o zorelo koova, hoy tou kral, miro ray, baro Devel, oun sharau či vavar har tiro čačepen. 17 Miro Devel, tou hal miro sikepaskro foun tiknes pre, oun ninna kanna rakrau me pral ko baro koova, hoy tou lauter kral. 18 Ninna kanna, kay phouro vom, oun mire balla parno van, ma dja mandar, miro Devel! Kamau te penap i čavengre čavenge oun lauterenge, kay pal lende venna, har zorelo tou hal. 19 Miro Devel, tiro čačepen djal bis pash o bolepen. Tou, kay kreh baro koova, koon hi yaake har tou, miro Devel? 20 Tou moukal boud oun bari daar ap mande te vell. Oun tou deh man pale nevo djipen, oun aneh man pale vin dran o telstunepen i phoubyatar. 21 Tou kreh man an-diklo, oun khosseh mire sva tele. 22 Yaake kamau me man pash toute te parkrell o bashepah ap i doryengri bashepaskri, kay rikral tou tiro lab, miro Devel. O bashepah ap i harfa kamau touke gilya te givell. Tou kokres hal o čačo Devel, ko Devel pral o Israel. 23 Tou lal miro djipen vin dran o merepen. Doleske dau gole i barhtyatar oun givau touke gilya. 24 Hako dives penau doureder, har tou rikral pash mande. Oun kolla, kay kaman miri bibarht, hounte venn tikno oun ladjenn pen. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.