Debleskri gili 7 - O Debleskro Lab 2024 (Sinte-Manouche)O Devel dell man čačo 1 I ropaskri gili, hoy givas o David o baro Debleske, har o Benyaminari Koush leske o djipen phares kras. 2 Baro Devel, tou hal miro Devel, pash toute khatrau man. Le man vin dran i vasta kolendar, kay man palla lenna! Te veh tou gar ap miri rig, 3 venn le har i levo oun taprenn man oun dandrenn man. Oun kek nay tserdell man mank lengre danda vin. 4 Baro Devel, tou hal miro Devel, me te krom savo koova, hoy penan le, oun te hi doosh ap mande, 5 te homs čilačes ap kolende, kay mange lačes kaman, oun kolendar čoroms, kay les mange phares kran, ninna te krom me lenge či, 6 palle mou lenn man palla kolla, kay hi rhoyede ap mande! Mou taprenn le man, oun vitsrenn man ap i phoub, oun moukenn le man an i čik čiddo! 7 Ab rhoyedo, baro Devel, oun hade tout ap kolende, kay rhoyede hi ap mande oun ap mande djan. Oun ab ap miri rig, oun rake o čačepen vin! 8 De i menshen dran i tsele themma khetne gole troul toute, oun besh tout dour pral lende ap tiro čačepaskro stamin! 9 Baro Devel, tou hal o baro čačepaskro ray pral i menshende dran i tsele themma. De man miro čačepen! Tou djineh, me hom tardo an o čačepen oun kek doosh hi ap mande. 10 Tou hal i Devel, kay an o čačepen tardo hi, oun dikeh an hakeneskro dji oun shero. Kanna kre, te nay krenn i čilače kek čilačepen bouder! Kre kolen zorelo, kay an o čačepen tardo hi! 11 O Devel rikrell peskro vast pral mande. Yob lell kolen dran i bibarht vin, kay shounenn ap leste pengro tselo djiyeha. 12 O Devel hi i čačepaskro ray, kay an o čačepen tardo hi. Yob hi i Devel, koleskri rholi nay rhačella hako dives. 13 Čačepah, pale las o čilačo peskro rharo, oun hadell peskro bogo, te dell lo karye. 14 Dik, peskro merepaskro rharo oun i fayle, hoy rhačenna, hadas lo pre, te dell lo karye! 15 Les hi čilačepen an o shero, oun midjak koova an o dji. Oun dran leste vell rhorhepen. 16 Yob hadas i rheb vin, hoy djas dour tele, oun peras palle kokres dren, – an koy rheb, hoy yob i vavareske vi-hadas. 17 Koy bibarht, hoy kamas lo ap i vavareste te anell, vas ap leskro shero pale. Ko čilačo koova, hoy kamas lo i vavareske te krell, peras ap leste pale. 18 Me parkrau man pash o baro Debleste, te hadas lo o čačepen pre, oun sharau o baro Debles, ko Debles pral halauter. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.