Debleskri gili 69 - O Debleskro Lab 2024 (Sinte-Manouche)

Le man vin dran miri ladj

¹ I gili o rayeske pral i gipangre, te givell pash o bashepen ap i shob-doryengri bashepaskri. Kay gili kras o David.

² Le man vin, mo Devel! O pani djal mange bis pash i meen.

³ Me tassau an sapeni čik, mire herya hatsenn kek phoub, kay yon nay tardo ačans. Hom an pani, hoy dour tele djal. Oun zorele panya kamenn man tele te tserdell.

⁴ Me dom gole, bis te man kek zoor bouder an mande his, oun miri meen doukas. Mire yaka van khino, yaake rah dikau pal miro Debleste.

⁵ Boudeder har mire balla ap miro shero hi kolla, kay hi rhoyedo ap mande, ninna te krom me len či. Oun kolen, kay kamenn mange čilačepen, hi bari zoor, oun kamenn man te marell. Me krom len či, oun hounte dap kova pale, hoy me gar čorom.

⁶ Miro Devel, tou djineh, har dinelo homs, oun prindjreh miri doosh, hoy ap mande anom.

⁷ Ma mouk kolen pengro patsepen te nashrell, kay pen ap toute rikrenna, te dikenn le har djoungeles mange djala. Tou, baro Devel, kay hal o ray pral o bolepen oun i phoub, ma mouk man te anap ladj ap kolende, kay tout rodenna, o Debles pral o Israel.

⁸ Dran toute hi i bari ladj ap mande, oun miro shero hi lolo i ladjatar.

⁹ Vom har i gadjo mire phralenge. I čave miri datar prindjrenn man bouder gar.

¹⁰ Kamau tiro kheer yaake boud, te rhačell miro dji an mande har i yag. Oun kolla, kay praasenn tout, praasenn man ninna.

¹¹ Rovom oun kamom či te rhal, oun yon san man doleske vin.

¹² Har rivom i gono an, te sikrap har pharo miro dji hi, kran le i sapaskri gili pral mande.

¹³ Ap i platsa, kay le khetne venn, rakrenn le pral mande. Oun mate givenn gilya pral mande.

¹⁴ Me mangau tout, baro Devel, o tsiro hi kay, te vess mange lačes. Mo Devel, tiro lačepen hi baro! Shoun man, rike tiro lab oun ab ap miri rig!

¹⁵ Le man vin dran kay sapeni čik, te tassap gar dren, Le man vin dran i vasta kolendar, kay kamenn man te marell! Tserde man vin dran o pani, kay hi man bouder kek phoub tel i herya,

¹⁶ te tserdenn man i zorele panya gar tele, oun me tassap. Ma mouk man te merell!

¹⁷ Shoun man, mo baro Devel, tiro lačepen hi mishto mange. Kre tiro dji mange dour pre oun dik ap mande!

¹⁸ Ma khate tout mandar, kay tiro boudepaskro hom! Me hom an bari daar, shoun man sik!

¹⁹ Ab pash mande oun le man vin! Le man vin dran i vasta kolendar, kay kamenn miro merepen.

²⁰ Tou prindjreh i ladj, hoy ap mande peras, tou djineh, har yon man praasan oun pal mande rakran. Kolla, kay mange o djipen phares krenn, hi lauter glan tire yaka.

²¹ Kay ladj phagell miro dji, oun krell man nasselo. Patsom, te khaytoms me yekes, te vals yek kay, kay mange mire sva tele khossals. Na-a, kote his kek, gar yek, kay kova krals.

²² Yon dan man i shoutlo rhapen, oun har his man troush, dan le man shout te piyell.

²³ An kol divessa, kay venn le khetne te rhan shoukar rhapen, mouk lengro rhapen lenge te vell i netsa, kay perenn le dren!

²⁴ Lengre yaka te venn korelo, te nay dikenn le bouder či! Le lendar lengri zoor, te djan le bango.

²⁵ De lenge i phagi! Oun tiri bari rholi mou taprell len.

²⁶ Mou vell koy platsa paash dino, kay lengre plarhtene khera tardo hi, te djivell bouder kek mensho koy.

²⁷ Yon lenn koles palla, koles tou dal, oun lenge hi shoukar, te rakrenn le pral i douka oun dava, hoy tou les dal.

²⁸ Čin haki doosh lendar an i liil; yaake te moukess len tou gar an tiro čačepen te vell.

²⁹ Le lengre laba vin dran tiro liil, kay kolla dren činlo hi, kay o djipen lenna, te hi yon gar dren činlo khetne kolentsa, kay an o čačepen tardo hi.

³⁰ Me hom čorvelo oun man hi boud douka. Mo Devel, ab ap miri rig oun de ap mande yak!

³¹ I gilyah kamau tout te sharell, oun tiro lab te hadell, oun man pash toute te parkrell.

³² Kova hi touke feteder har te anap touke i groumni, ava, i zorelo gouroum, te vell lo touke rhačedo.

³³ Te dikenn kova kolla, kay tele rikedo hi, venn le barhtelo. Oun kolenge, kay o Debles rodenna, djivell lengro dji pale pre.

³⁴ O baro Devel shounell i gole kolendar, kay tele-rikede hi, oun bistrell peskre pandle menshen gar.

³⁵ O bolepen oun i phoub sharenn les! Ninna i bare panya oun halauter, hoy dren djivell.

³⁶ O Devel vell o foreske Sion ap i rig, oun krell i forya an o them Youda pale neves. Leskre menshe djivenn kote, oun o them hi lengro.

³⁷ Oun i čave kolendar, kay hi o Debleske koy, lenn ko them. Oun kolla, kay o Debles o djiyestar kamenna, djivenn koy.