Debleskri gili 68 - O Debleskro Lab 2024 (Sinte-Manouche)

O Devel hi o zorleder

¹ I gili o rayeske pral i gipangre. O David kras kay gili.

² O Devel stell pre, oun tradell kolen krik, kay kamenn les gar; ava, kolla, kay hi rhoyedo ap leste, hounte nashenn lestar.

³ Yaake har i yagakro dourho krik phourdedo vell, yaake phourdell yob len krik. Yaake har i momeli rhačrell tele oun bouder gar koy hi, yaake venn kol čilače bouder gar diklo glan o Debleste.

⁴ Hi vavarčandes kolentsa, kay an o čačepen tardo hi: Yon venn barhtelo, stenn oun sanenn i barhtyatar glan o Debleste.

⁵ Givenn o Debleske! Bashrenn oun hadenn leskro lab! Krenn leske i drom, koleske, kay oulerell ap o bolepen. Baro Devel hi leskro lab. Avenn barhtelo oun givenn glan leste!

⁶ O Devel, kay djivell an peskro raylo kheer, yob hi i dad kolenge, kolen kek dad bouder hi. Oun yob vell kol romyenge ap i rig, kolengro rom meras.

⁷ Kolen, kay kokres hi, anell lo khere, kolen, kay stilde hi, lell lo vin dran o stilepen, te djal lenge pale mishto. Hi vavarčandes kolentsa, kay kamenn či lestar te djinell: Kolla hounte ačenn an o moulo them.

⁸ Maro Devel, har djal tou glan tire menshende, oun anal len ap o drom mashkral o moulo tato them,

⁹ kote trissas i phoub, oun o bolepen das baro brishin glan toute, o Debleste ap i berga Sinay, ava, glan o Debleste pral o Israel.

¹⁰ Tou, maro Devel, dal doha brishin, oun moukal tiro tato themes pale pre te djivell,

¹¹ te djivan nay tire menshe kote. Tou, maro Devel, hal yaake lačo, te moukal kol čorvelen kote khere te vell.

¹² O baro Devel penas i lab; oun boud djouvya nashan oun penan ko shoukar koova, hoy djas:

¹³ “I bare raya nashenn penge, lengre lourde hi ap o naashepen, oun kova hoy yon hounte moukan čiddo, hi boudeder har boud. Oun khere denn i djouvya hakenes kolestar.

¹⁴ Kamenn t'mer vin ap o them pash i bakre te ačell? Kote hi čomone čiddo, hoy vi-dikell har i roupene oun sonakangre čirklengre moussya.”

¹⁵ An ko tsiro, har o zorelo Devel i bare rayen dran o them tradas, peras gib ap i berga Zalmon.

¹⁶ Baro hi i berga Bashan. Lat his boud bergetikre sherya.

¹⁷ T'mer berge, t'mer bergetikre sherya, hoske zilverenn t'mer ap koy berga, kolat o Devel peske vin rodas, te djivell yob kote? Ava, hako tsireske ačell o baro Devel koy.

¹⁸ Boud zerya vourdya hi o Debles. Lentsa vas lo ap i berga Sinay, oun djal dren an peskro kheer.

¹⁹ Tou, Devel, djal pre an o pralstunepen oun lal stilde touha. Tou lal kouč koova kol menshendar, kay kaman či toutar te djinell. Tou, baro Devel, djiveh kote.

²⁰ Sharedo vell o Devel, maro ray, hako dives! Yob hidjrell menge o pharo koova, oun vell menge ap i rig.

²¹ Men hi i Devel, kay menge koy hi. Yob hi o baro Devel, maro ray, kay lell men vin dran o merepen.

²² Kolenge, kay les gar kamenna, stakrell lo o shero dren, hake čilačenge, kay moukenn gar pengro čilačepen.

²³ O Devel, miro ray, penas: Me anau len pale i bergatar Bashan, ninna dran o telstunepen o baro panyestar anau len pale pale.

²⁴ Yaake te thoveh tire herya an o rat kolendar, kay kaman tout te marell, oun tire djoukle piyenn les.

²⁵ Miro Devel, tou hal miro baro ray. Halauter dikenn har tou veh an tiri zoor, oun dren djah an tiro Debleskro kheer.

²⁶ I gipangre djan glan toute oun i bashepangre pal toute. Oun mashkral dren djan i terne ča oun denn pengre pauke.

²⁷ “Sharenn o Debles kote, kay peskre menshe khetne venna! Sharenn o baro Debles, t'mer, kay han dran o Israel.”

²⁸ I menshe dran o kheer Benyamin, ko terneder čavo o Yakobeskre čavendar, djan glan i vavarende. Pal lende venn i pralstoune dran o kheer Youda pengre boud menshentsa, pal lende i pralstoune dran o kheer Zabulon oun dran o kheer Naftali.

²⁹ Biče tiri zoor, maro Devel, tiri zoor, hoy tou ap mende sikral!

³⁰ Dran tiro Debleskro kheer an o foro Yerusalem, kay anenn touke i bare raya kouč koova,

³¹ de ko themes Egiptia trad, ko divyo firhes pash o pani. Činge kol zorelentsa oun rayentsa pral boud menshende! Čip tout kolenge an o drom, kay pal o roup nashenna. Trade kol natsyone, kolenge o marepen shoukar hi.

³² Dran o them Egiptia venn bičepangre pash toute, oun kolla dran o them Etiopia hadenn pengre vasta pre pash o Debleste.

³³ T'mer themma ap kay phoub, givenn o Debleske, bashrenn leske, maro rayeske!

³⁴ Yob oulerell pral pre ap o bolepen, hoy hako tsiro koy his. Shounenn, har zoreles yob gole dell!

³⁵ Hadenn o Debles! Yob hi o bareder. Leskro raylepen hi pral o Israel, oun leskri zoor djal bis ap i volke.

³⁶ Har baro hi o Devel an peskro Debleskro kheer! Yob hi o Israeleskro Devel, oun krell peskre menshen zoreles, oun dell len zoor pral vavar menshende. Sharedo vell o Devel!