Debleskri gili 66 - O Debleskro Lab 2024 (Sinte-Manouche)O Devel anell men i lačo drom 1 I gili o rayeske pral i gipangre. 1 I gili o rayeske pral i gipangre. Sharenn o Debles ap i tseli phoub! 2 Givenn leske, te vell leskro lab hadedo! Rakrenn vin, har raylo yob hi! 3 Penenn ap o Debleste: Har baro hi kova lauter, hoy tou kral. Kolla, kay tout gar kaman, hounte čivenn pen tele glan toute, glan tiri bari zoor! 4 Mou mangell tout i tseli phoub an oun sharell tout i gilyentsa, ava, mou sharenn le tiro lab. 5 Avenn oun dikenn, hoy o Devel kras. I menshenge ačell o rakepen krik, te dikenn le, hoy kras lo ap lende. 6 Dran o baro pani kras yob i trouk phoub. Yon nay djan mashkral ap i vavar rig. Pral kova givam i barhtyatar. 7 Yob hi o baro ray hako tsireske. Leskri zoor pral i menshenge hi baro. Hake themma lell yob an o yak, te nay hadenn pen kolla gar, kay lestar tele peran. 8 T'mer menshe an hake themma, sharenn maro Debles! T'mari sharepaskri gili te vell dour shounlo! 9 Yob rikras men ap o djipen, oun das yak, te peras gar. 10 Tou, maro Devel, kamal te dikell, har maro dji ap toute rikrell. Doleske kral tou mentsa har o roupeha, hoy an yag thodo vell, te vell lo djoudjo. 11 Tou moukal men pandlo te vell, oun čival menge pharo koova pre. 12 Tou moukal menshe pral mende te vell, moukal men an i yag oun an o pani te djal. Oun palle anal tou men dran lauter vin oun dal men nevi zoor. 13 Doleske kamau an tiro kheer te djal, te anap touke firhen, hoy touke rhačedo venna. Kamau te dap tout, hoy dom man sovel glan toute. 14 Anau, hoy penom oun vin rakrom, har mange o djipen phares his. 15 I thoulle bakrendar anau me touke, te venn le touke rhačedo. Ninna groumya oun bouzya anau glan toute. Te venn le rhačedo ap tiri rhačepaskri, djal i yagakro dourho pre pash toute. 16 Avenn oun shounenn, t'mer lauter, kay ap o Debleste patsenna, te penap t'menge, hoy yob mange kras. 17 Miro mouyeha dom gole ap leste, miri čipyah sharom les. 18-19 Yob shounas miri gole, oun das yak ap kova, hoy lestar mangom. Te vals man čilačepen glan an miro dji, shounals man o Devel, miro ray, gar. 20 Sharedo vell miro Devel! Yob rissras pes gar krik miro mangepastar, oun las peskro lačepen gar mandar. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.