Debleskri gili 64 - O Debleskro Lab 2024 (Sinte-Manouche)O Devel hi zorleder har kolla, kay rakrenn čilače čipyentsa 1 I gili o rayeske pral i gipangre. O David kras kay gili. 2 Miro Devel, shoun har ap toute rovau. Man hi daar glan kolende, kay kamenn man te marell. De yak ap miro djipen! 3 Kol čilače venn khetne oun rakrenn, har yon nay krenn mange čilačepen. Khate man, miro Devel, glan lengri rholi! 4 Lengre čipya hi har rhare, hoy mishto činenna, lengre laba doukrenn har fayle. 5 Ap yek kopo denn le karye dran pengro khatepen ap koleste, kay o čačo drom djal, oun ladjenn pen gar. 6 Yek krell o vavares zoreles an lengro čilačo koova. Oun yon rakrenn pen tele, har nay čivenn le dorya vin, te perenn i vavar dren, oun penenn pashel: “Koon dikell kova?” 7 Len hi čilačepen an o shero, oun penenn čorrhanes: “Yaake krah mer kova. Yaake djal kova mishto. Har goseve ham mer!” 8 O Devel dell ap lende karye. Sik hi le ap i phoub čiddo. 9 Lengre laba kokres krenn, te san kolla pral lende, kay dikenn len. 10 Oun lauteren taprell i daar, oun yon penenn: “Kava kras o Devel”, oun hayvenn, te vas kova lestar. 11 Kolla, kay an o čačepen tardo hi, hi barhtelo pral o baro Debleste, oun rikrenn pen ap leste. Oun hakeno, kay shounell ap o Debleste o djiyestar, sharell pes leha. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.