Debleskri gili 63 - O Debleskro Lab 2024 (Sinte-Manouche)Miro dji djal pal miro Debleste 1 I gili o Davidestar. Yob kras kay gili an o moulo tato them Youda. 2 Devel, tou hal miro Devel. Tout rodau me o djiyestar. Miro dji djal pal toute. Man hi troush pal toute har i trouk tato them troushell pal o pani. 3 An tiro kheer rodau tout, kamoms te dikap tiri zoor oun tiro raylepen. 4 Tiro lačepen hi mange boudeder moldo har o djipen. Doleske sharau tout. 5 Me parkrau man pash toute yaake rah har me djivau. Oun me hadau mire vasta pre, te mangap tout an. 6 Tou kreh miro dji yaake čalo oun barhtelo, har te rhap i shoukar rhapen. Miro mouy givell touke i gili oun sharell tout. 7 Me te hom ap o čiben čiddo, veh tou mange an o shero. An i rat, kay me sovau gar, rakrau touha an miro dji. 8 Tou val ap miri rig, Tou rikreh tiro vast pral mande, har i čirklo rikrell peskre moussya pral peskre ternende. Kote givau touke i barhtyatar i gili. 9 Miro dji rikrell pes ap toute. Tiro čačo vast rikrell man. 10 Kolla, kay kamenn man moulo te dell, mou merenn le, oun djan tele an o moulengro them! 11 Mou dell len o rharo moulo, oun i divye djoukle te rhan len! 12 O baro ray hi barhtelo pral o Debleste. Koon dell pes sovel glan o Debleste, kova nay sharell pes. Oun i rhorhenenge vell o mouy pandlo. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.