Debleskri gili 62 - O Debleskro Lab 2024 (Sinte-Manouche)

Pash o Debleste hi man kek daar

¹ I gili o rayeske pral i gipangre, o Yedoutoun. Kay gili kras o David.

² Pash o Debleste kokres hi miro djiyes kek daar, Yob vell ap miri rig.

³ Yob hi mange har i baro zorelo kheer ap i barreskri berga, kay man khatrau, oun yob ap mande yak della, yaake te perap gar.

⁴ Har rah djan t'mer lauter ap yek morsheste, te denn les moulo? Hom bouder či har i bango kheer, hoy kamell dren te phagell, oun koleskre barra bouder gar khetne rikrenna.

⁵ T'menge djal an o shero trouyel, har nay krenn te perap khetne. O rhorhepen hi t'menge shoukar. T'mare mouyentsa rakrenn t'mer i barht vin pral yekeste, oun an t'mare djia rakrenn i bibarht pral leste.

⁶ Pash o Debleste kokres hi miro djiyes kek daar! Djinau, yob hi, kay krell halauter mishto.

⁷ Yob hi har i baro zorelo kheer ap i barreskri berga, kay man khatrau, oun yob ap mande yak della, yaake te perap gar.

⁸ Miro Deblestar vell, te vap vin lino dran o čilačepen, oun te vap an-diklo. Lestar vell miri zoor, pash miro Debleste khatrau man.

⁹ Dikenn ap leste hako tsiro, t'mer, leskre menshe! Čorenn t'mare djia vin glan leste! Pash o Debleste nay khatrah men.

¹⁰ I menshe hi či har i dourho. Tikne har bare hi či moldo. Te vans le ap i vaga čiddo, vans le lauter khetne lino gar phareder har i dourho.

¹¹ Ma patsenn, te lenn bravlepen, te djan ap yekeste i zoryah pre! Ma patsenn, te krell t'men kova bravelo, hoy čoran! Ninna te venn bravleder oun bravleder, ma čivenn t'mare djia pre!

¹² Boudeder har yek kopo shounom: O Devel kokres hi zorelo,

¹³ oun leskro lačepen hi baro. Tou, miro ray deh hakenes pal kova, hoy yob kras.