Debleskri gili 60 - O Debleskro Lab 2024 (Sinte-Manouche)O mangepen kol menshendar, kay patsenn, te van le o Deblestar bistedo 1 I gili o rayeske pral i gipangre te givell pash o bashepen ap i doryengri bashepaskri. O David kras kay gili, te sikrell lo mende čomone. 2 Yob kras lat an ko tsiro, har lo an o marepen his i menshentsa Aram dran Mesopotamia oun Soba. Har vas lo pale, maras o Yoab i Edomarya an i Londi Tala: deesh-te-douy zerya morshen. 3 Miro Devel, tou čival men pale, oun tradal men kate te kote. Bari rholi hi tout ap mende. Rake mentsa pale lačes! 4 Tou kral, te trissas i phoub yaake, te phagas li. Kre lat pale tseles, te phagell li gar khetne! 5 Tou moukal tire menshen pharo koova te dikell. Tou dal men savi mool te piyell, te vam mato. 6 Kolen, kay touha djivenna oun ap toute shounenna, sikral, har te nay nashenn le penge glan i lourdende. 7 Ab ap mari rig tiro zorelo vasteha oun le men, tire malen, vin! Shoun, har dah ap toute gole! 8 O Devel penas an peskro kheer, kay yob djivell: “Me vom o zorleder”, “Me dau o foro Sichem mire menshende, oun ninna i tala Soukot. 9 O them Gilead hi miro oun o them Manasse hi miro. O them Efrayim hi miri sasterni stadi, oun o them Youda hi kova, koles penepaske hi. 10 O them Moab hi miro thopaskro čaro. Ap o them Edom vitsrau miro kirarh. Pral i Filistarya dau gole: Me hom o zorleder!” 11 Koon anell man an ko zorelo foro? Koon anell man an o them Edom? 12 Koon nay krell kova, har tou kokres, maro Devel? Tou moukal men oun djah gar vin mare lourdentsa an o kourepen. 13 Ab tou ap mari rig oun le men vin dran i čilače vasta! Te hi menshe ap mari rig, hi kova čičeske oun či moldo. 14 Maro Debleha krah mer baro koova. Oun yob stakrell kolen khetne, kay yaake zoreles ap mende djan. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.