Debleskri gili 59 - O Debleskro Lab 2024 (Sinte-Manouche)O mangepen yekestar, koleske boud morsha čilačepen kamenn 1 I gili o rayeske pral i gipangre, te givell har koy gili Ma mare men . O David činas kay gili an ko tsiro, har o Saul peskre lourden troul leskro kheer tardo čivas, te denn le les moulo. 1 I gili o rayeske pral i gipangre, te givell har koy gili Ma mare men. O David činas kay gili an ko tsiro, har o Saul peskre lourden troul leskro kheer tardo čivas, te denn le les moulo. 2 Le man vin dran i vasta kolendar, kay kamenn mange čilačepen, miro Devel! An man krik kolendar, kay ap mande djan! 3 Le man vin dran i vasta kol čilačendar, kol menshendar, kay kamenn te dikell, har miro rat nashell. 4 Dik, baro Devel, har yon lourenn, te marenn le man! Fothe krom me či, oun kek doosh ap mande hi, djan zorele morsha khetnes ap mande. 5 Ninna te krom me kek čilačepen, nashenn le kay, te denn le man moulo. Ste pre! Ab oun dik les touke kokres an! 6 Baro Devel, tou, kay hal o ray pral o bolepen oun i phoub, oun o Israeleskro Devel, ste pre oun de kol menshen an i tsele vavar themma pengri phagi! Ma ab lačes ap kolende, kay phoukepangre hi! 7 Haki rat venn le pale oun nashenn čorrhanes troul o foro. Har djoukle denn le gole. 8 Čilačepen vell dran lengro mouy vin. Lengre laba činenn har rhare. Yon patsenn, te shounell len kek. 9 Tou, mo baro Devel, tou saneh pral lende. Ava, tou saneh pral kol menshende an kol tsele vavar themma. 10 Tou hal miri zoor. Ap toute kamau me man te rikrell. Miro Devel, tou hal mange i zorelo kheer. 11 Tou hal lačes ap mande. Tou hal ap miri rig oun moukeh man zorleder te vell har kolla, kay kamenn man te marell. 12 Ma de len moulo, te bistrenn kova mire menshe gar! Trade len tiri zoryah, te nashenn le kate te kote! Stake len tele, tou, kay rikreh tiro vast pral mende. 13 Yon praasenna oun rhorhenna. Hako labeha, hoy yon penenn, doukrenn le tout. Mouk lengro pre-phourdepen i shello lenge te vell, yaake te hounte perenn le, oun venn kokres dren pandlo. 14 De len moulo an tiri bari rholi! De len moulo, te ačell lendar či, yaake te dikell hakeno ap i tseli phoub, kay tou, maro Devel, o ray hal pral o Israel. 15 Oun haki rat venn le pale, nashenn troul o foro trouyel, oun denn gole har i djoukle, 16 hoy nashenn trouyel, te rodenn le penge rhapen. Oun te venn le gar čalo, sikrenn le pengre danda. 17 Me kamau tiri zoryatar te givell. Taysarlakro sharau tiro lačepen. Tou hal mange i zorelo kheer, oun i khatepen an kol divessa, kay mange ropaske hi. 18 Tou hal miri zoor. Touke kamau te bashrell, miro Devel. Tou hal mange i zorelo kheer. Tou hal ko Devel, kay mange lačes hi. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.