Debleskri gili 57 - O Debleskro Lab 2024 (Sinte-Manouche)

Mo Devel, pash toute nay khatrau man

1 I gili o rayeske pral o gipangre, te givell har koy gili Ma mare men . O David činas kay gili an ko tsiro, har yob glan o Saul ap o naashepen his, oun pes an koy grotta khatras.

¹ I gili o rayeske pral o gipangre, te givell har koy gili Ma mare men. O David činas kay gili an ko tsiro, har yob glan o Saul ap o naashepen his, oun pes an koy grotta khatras.

² Kre tiro dji mange pre, miro Devel! Kre tiro dji mange pre! Pash toute vau, te khatrap man. An tire moussya nashau, bis te kay bibarht krik djas.

³ Ap o Debleste, ko pralstuneste, dau me gole, ap koleste, kay miro koova mishto krella.

⁴ Dran o bolepen mou vell lo mange ap i rig, oun lell man vin dran o praasepen kolestar, kay man palla lell. O Devel mou sikrell man, te hi lo mange lačo, oun te rikrell lo pash mande.

⁵ Me hom čiddo mank menshe, kay hi har leve, kay kamenn man pre te rhal. Lengre danda hi har čourya oun fayle, oun lengri čip dell čourye har i rharo.

⁶ Sike tiro barepen, hoy bareder hi har o bolepen, miro Devel! Tiro raylepen mou vell pral i tseli phoub!

⁷ I netsa čivan le glan mire pire, te perap dren. I dori pandan le troul miri meen. Ap miro drom hadan le i rheb vin, – oun yon peran kokres dren.

⁸ Zorelo vas miro dji, miro Devel, zorelo vas miro dji. Me kamau touke te givell oun te bashrell.

⁹ Ste pre miro dji! Kamau te bashrap ap i doryengre bashepangre. Kava dives kamau me o khames pre te djangrell!

¹⁰ Mank i menshende dran boud themma kamau tout te sharell, miro ray. Glan i natsyone kamau touke te givell.

¹¹ Tiro lačepen hi yaake baro har o bolepen. Oun tiro čačepen djal bis pash i volke.

¹² Sike tiro barepen, hoy bareder hi har o bolepen, miro Devel! Tiro raylepen mou vell pral i tseli phoub!