Debleskri gili 55 - O Debleskro Lab 2024 (Sinte-Manouche)

O mangepen yekestar, ap koleste peskro maal phoukras

¹ I gili o rayeske pral o gipangre, glan te givell pash o bashepen ap i doryengre bashepangre. O David kras kay gili.

² Miro Devel, shoun miro mangepen! Me rovau ap toute. Ma khate tout mandar!

³ Dik ap mande oun shoun, har gole dau oun rovau.

⁴ Kolla, kay kamenn man čilačepen, krenn bare laba, oun o čilačo dell man trad. Yon kamenn bibarht pral mande te anell, oun djan ap mande pre bari rholyah.

⁵ Miro dji kamell i trashatar tardo te ačell. Oun me darau, te hounte merap.

⁶ I daar tapras man yaake, te trissau, oun o shil čivas pes ap mande.

⁷ Kamoms moussya har i čirklo, te nay hadoms man pre oun djoms krik, oun hatsoms i platsa, kay nay krell man kek čomone.

⁸ Dour krik djoms oun ačoms an o moulo tato them.

⁹ Sik nashoms, te khatrap man glan o baro oun zorelo dourho, hoy pral i phoub phourdell, oun glan o baro brishin.

¹⁰ Miro ray, kre, te rakrenn le boud čipyentsa, te hayvenn le pen bouder gar! An o foro dikau či har čilačepen oun čingepen,

¹¹ hoy kolla krenn, kay djan hako dives oun haki rat trouyel pral ap i barra, hoy djan troul o foro. Oun an o foro hi bibarht oun čorvlepen.

¹² O čilačo koova hi baro mank lende. Ap i dromma, kay parenn oun bikrenn le, venn i menshe tikno rikedo oun rhorhedo.

¹³ Kova, kay praasell man kanna, hi gar yek kolendar, kay kaman mange čilačepen. Palle hidjroms kova. Yob, kay hadell pes pral mande, hi gar kolendar, kay djan ap mande pre. Palle khatroms man glan leste.

¹⁴ Na-a! Tou hal kova, yek mendar, miro maal, kova, kay leske lauter penoms.

¹⁵ Mer hayvam men yaake mishto, oun djam khetne an o Debleskro kheer.

¹⁶ Mou taprell o merepen sik kolen, kay kamenn man te marell! Mou vell lo sik pral lende, te djan le djides an o moulengro them! O čilačepen hi an lengre djia khere.

¹⁷ Me dau ap miro Debleste gole. Oun o baro Devel lell man vin dran lengre vasta.

¹⁸ Rati oun taysarlakro oun mashkral o dives, anau miro mangepen oun miro ropen glan leste, oun yob shounell ap mande.

¹⁹ Yob lell miro djipen vin dran i vasta kol boudendar, kay ap mande djan. Oun krell, te moukenn le tele mandar.

²⁰ O Devel, kay hako tsiro o Devel hi, kova shounell miro mangepen oun stakrell len tele, kolen, kay kamenn pal pengro shero te djivell, oun kamenn lestar či te djinell.

²¹ O phoukepaskro djal ap peskro maleste pre oun rikrell gar peskri sovel, hoy das lo leste glan o Debleste.

²² Leskro rakepen hi goudlo har gvin. An leskro dji kamell le o kourepen. Leskre laba hi har djet, oun činenn har rhare.

²³ Vitse kova, hoy touke phares hi, ap o baro Debleste! Yob hi kova, kay lell tiro koova an peskro vast. An kek tsiro moukell yob koles te perell, kay an o čačepen tardo hi.

²⁴ I marepangren oun rhorhenen vitsreh tou, miro Devel, dour tele an o telstunepen. Glan ko tsiro, kay lengro djipen paash trouyel hi, merenn le. Me kamau ap toute te dikell oun man te rikrell.