Debleskri gili 51 - O Debleskro Lab 2024 (Sinte-Manouche)Miro Devel, biste miri doosh! 1 I gili o rayeske pral i gipangre. O David kras kay gili, 2 har o Debleskro rakepaskro Natan pash leste vas, pal kova o David i vavareskri romyat, i Batsheba, las. 3 Miro Devel, tou hal yaake lačo, oun tiro kamlepen hi baro! Dik lačes ap mande! Oun le ko čilačo koova, hoy krom, mandar krik! 4 Thob miri doosh mandar tele, oun le ko tselo čilačepen mandar krik, te vap pale djoudjo! 5 Ava, djinau, kay anom doosh ap mande. Oun ko čilačo koova, hoy krom, hi man o tselo tsiro glan mire yaka. 6 Ap toute kokres krom, hoy čilačo hi. Ava me krom, hoy midjak hi glan tire yaka. Doleske hi tout čačes an tiro rakepen. Tou kreh o čačepen, te deh man i phagi. 7 Doosh hi ap mande, yaake rah har hom ap kay phoub, ninna har boldo vom, his o čilačepen ap mande. 8 Tou rodeh o čačepen an o mensheskro dji. An miro dji sikreh tou, har te vap gosevo. 9 Le miri doosh mandar krik! Palle hom djoudjo an miro dji. Thob man! Oun me vau parneder har gib. 10 Mouk man pale barht te hayvell! Tou phagal man, kanna mouk man pale te stell! 11 Ma dik ap miri doosh, oun le o čilačo koova, hoy krom, mandar krik! 12 Miro Devel, de man i nevo dji, hoy hi djoudjo oun touke kokres koy! 13 Ma trade man toutar krik! Ma le tiro dourho mandar krik! 14 Mouk man te dikell, kay hal pash mande, te sal miro dji pale! De man i dji, hoy shounell ap toute! 15 Kolen, kay shounenn gar ap toute, kamau me tiro drom te sikrell, te moukenn le pengro čilačo drom, oun venn pale pash toute. 16 Me anom rat ap mande, ma de man moulo, miro Devel! Tou hal o Devel, kay lell man vin dran o merepen. Oun me kamau tiro čačepen te sharell. 17 Baro Devel, kre miro mouy pre, te rakrap, hoy sharell tout! 18 Fiche, hoy anenn le touke, kameh gar. Te vals yaake, doms len toute. Fiche, hoy touke rhačedo venna, krenn tiro dji gar barhtelo. 19 Kova, hoy tou kameh te vell touke anlo, hi i phagedo dji. Ap i mensheste, kay rovell pral peskri doosh, dikeh tou, miro Devel, lačes. 20 Kre lačepen ap o foro Sion! Ab ap i rig kol menshenge an o foro Yerusalem, te venn i barra o forestar pale neves pre-čiddo! 21 Palle anenn le touke lačo koova an o čačepen, ninna firhe, hoy touke tseles rhačedo venn. Ava, palle venn touke terne gourma rhačedo ap tiri rhačepaskri. Oun tou dikeh lačes ap kova lauter. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.