Debleskri gili 50 - O Debleskro Lab 2024 (Sinte-Manouche)

Har mangas mer o Debles čačes an?

1 I gili o Asafestar.

¹ I gili o Asafestar. O Devel rakrell, o baro oun zorelo Devel dell i menshen ap i tseli phoub gole, kotar, kay o kham pre djas bis kote, kay lo tele djal.

² Ap i berga Sion, an o shoukeder foro, sikras pes o Devel an peskro raylepen.

³ Maro Devel vella oun moukell pes te shounell. Glan leste nashell i yag oun rhal lauter pre. Oun troul leste phourdell i baro zorelo dourho.

⁴ O Devel vell te rakrell lo o čačepen vin pral peskre menshende. Ap o bolepen oun i phoub dell yob gole:

⁵ “Anenn mange mire menshen khetne, kay mantsa vin kran, te vap me lengro Devel, oun mange firhen anan.”

⁶ O bolepen kharell: O Devel hi o čačepaskro ray! Oun lauter hoy yob vi-rakrell, hi čačo.

⁷ “Mire menshe, shounenn! Me kamau rakrell. Israel, shoun, har me, tiro Devel penau touke, kay kova, hoy kral, gar mishto hi.

⁸ Čingrau gar, te anals tou mange kek firhen. Kol firhen, hoy tou mange rhačral, hi hako dives glan mire yaka.

⁹ Man hounte vals kek gouroum dran tiri stanya, vitar kek bakre.

¹⁰ I tsele firhe an o veesh hi mire, oun ninna kol firhe ap i zerya berge hi mire.

¹¹ Me prindjrau i tsele čirkle ap i berge. Oun kova, hoy ap i phoub yaake trouyel nashella, prindjrau me lauter.

¹² Te vals man bok, me penoms touke kova gar. I tseli phoub hi miro oun lauter, hoy ap late hi, ninna.

¹³ Rhap me groumyakro mass? Piyap me o rat i bakrendar? Na-a!

¹⁴ Kova, hoy toutar kamau, hi, te parkress tout pash mande, tiro Debleste, oun te rikress tiri sovel, hoy dal tou mande, o pralstuneste.

¹⁵ Oun de gole ap mande ap ko dives, kay hal an i bibarht! Palle lau tout vin, oun tou sharess man.”

¹⁶ Ap o čilačeste penell o Devel: “Hoske leh tou mire laba an o mouy? Hoske peneh, me voms tiro Devel?

¹⁷ Kova rhoyrell tout, te hounte rikress tout ap mire laba. Kova, hoy touke penom, kameh tou gar te krell.

¹⁸ Hako kopo, kay dikeh tou i čorepaskres, kreh tou tout leskro maal, oun hal beshdo khetne kolentsa, kay djan i vavar romyentsa.

¹⁹ Dran tiro mouy vell praasepen vin. Oun tiri čip rakrell rhorhepen.

²⁰ Tou rakreh djoungeles pral tire phralende. Pral tiri dakro čaveste aneh tou rhorhepen pre.

²¹ Kova kral tou, oun me penom kek lab. Koy rikral tou man har yek, kay hi yaake har tou. Me sikrau tout koy doosh, hoy anal ap toute, oun anau touke tiro čilačo koova glan tire yaka.

²² T'mer, kay kamenn či mandar te djinell, hayvenn, hoy penom, te vap gar oun dap t'men, oun kek hi koy, kay lell t'men vin dran miro vast.

²³ Kova, kay pes pash mande parkrella, hi kova, kay sharell man. Kova hi o drom, kay sikrau leste, har lačo leske hom.”