Debleskri gili 5 - O Debleskro Lab 2024 (Sinte-Manouche)

Mo Devel, sike man o drom, hoy čačo hi glan toute!

1 I gili o rayeske pral i gipangre, te givell pash o bashepen ap i tikni phourdepaskri . O David kras kay gili.

¹ I gili o rayeske pral i gipangre, te givell pash o bashepen ap i tikni phourdepaskri. O David kras kay gili.

² Baro Devel, shoun mire laba! Shoun, har me ap toute rovau!

³ De yak ap miri gole! Tou hal miro baro ray oun miro Devel, koles me mangau.

⁴ Baro Devel, sik taysarlakro dau gole ap toute. Sik taysarlakro vau pash toute oun penau touke, hoy mange ap o dji hi. Oun dau palle yak, hoy tou mange peneh.

⁵ Tou hal i Devel, kay čilače dromma gar kamella. Pash toute nay ačell i čilačo gar.

⁶ Kol pre-phourden kameh tou gar glan tire yaka te dikell, oun tou rhoyreh tout ap hakeneste, kay i vavarenge čilačepen krella.

⁷ Tou mareh kolen, kay o rhorhepen rakrenna. Praasedo hi glan o baro Debleste kolla, kolen doosh ap o rat i vavarendar hi, oun kay i vavaren rhorhenn.

⁸ Mange hal lačes oun moukeh man an tiro kheer dren te djal. Me nay vitsrau man tele glan tiro raylo kheer, oun nay mangau tout an.

⁹ Baro Devel, sike man o drom, hoy čačo hi glan toute! Kre mange o drom, hoy te djap! Mouk kolen te dikell, kay mange čilačepen kamenna, kay hal tou ap miri rig!

¹⁰ Ap lengro lab nay dell yek či. An lende hi čilačepen. Lengro rakepen anell o merepen. Yon rakrenn douy čipyentsa.

¹¹ Čip lengri doosh ap lengre shere, mo Devel! Mouk len te perell an pengre netse, hoy yon i vavarenge kran! Trade len toutar krik! Boud kope kran le o čilačepen. Pral toute hadan le pen.

¹² Barhtele venn kolla, kay khatrenn pen pash toute! Kolla denn gole i barhtyatar o tselo tsiro. Tou rikreh tiro vast pral lende. Doleske sanenn oun givenn le – kolla, kay tiro lab kamenna.

¹³ Tou, baro Devel, čiveh tiri barht ap kolende, kay an o čačepen tardo hi. Tou čiveh tiro lačepen troul lende har i plaashka, yaake te nay doukrell len či.