Debleskri gili 49 - O Debleskro Lab 2024 (Sinte-Manouche)O bravlepen ap kay phoub hi či moldo 1 I gili o rayeske pral i gipangre. Kay gili hi yekestar dran i familya Korah. 2 T'mer menshe an hake themma, shounenn mishto! T'mer lauter, kay ninna han, krenn t'mare kanda pre! 3 An-dikle menshe oun save, kay gar an-diklo hi, bravele oun čorvele, t'mer lauter, shounenn! 4 Miro mouy rakrell goseve laba, oun dran miro dji vell kova, hoy mishto hayvom. 5 Miro kand shounell ap goseve laba, oun hoy kolla kamenn te penell, kamau me t'mende te sikrell pash o bashepen ap i doryengri bashepaskri. 6 Hoske te darap an i čilače divessa, kay kolla troul mande hi, kay mange čilačepen kamenna? 7 Yon čivenn pengro patsepen ap pengro bravlepen, oun sharenn pen har bravele yon hi. 8 Kek menshes hi doha love, te nay ginell lo peskro phraleskro djipen o Deblestar, oun peskro djipen vitar gar. 9 I mensheskro djipen hi yaake kouč, te nay playsrell lo les gar. An kek tsiro hi les doha te dell, 10 te nay djivell lo hako tsiro, oun hounte merell gar. 11 Na-a, mer dikah: O gosevo hounte merell, yaake har o narvelo oun o dinelo ninna. Oun lauter, hoy len his, hounte moukenn le pale i vavarenge. 12 Paskedo venn le oun ačenn an lengre moulengre khera hako tsiro, ninna te das i tsiro, kay dan le pengro them pengro lab. 13 Fothe bravelo i mensho ninna hi, yob hounte merell yaake har i firho ninna. 14 Dikenn har kolenge djala, kay hi yaake dinelo oun kamenn pengro rakepen te shounell! 15 Har bakre djan le an o moulengro them. Lengro bakrengro, kay anell len ap o drom, hi o merepen. Sik vell ko dives, kay venn o Debleskre menshe i raya pral kolende, kolengro mass tele merell an i phoub, kay hounte ačenn le pash i moulende. 16 Miro djipen lell o Devel vin dran o merepaskri zoor. Ava, yob lell man pash peste. 17 Ma rhoye tout, te vell yek bravelo, oun leskro kheer bareder oun shoukeder vella! 18 Te merell lo, lell lo či peha. Leskro tselo bravlepen hounte ačell pale. 19 Ninna te sharell lo pes pral peskro shoukar djipen, oun i vavar penenn leske shoukar laba, te djal leske mishto, 20 hounte merell lo oun djal kote, kay leskre moule phoure hi, kolla, kay bouder gar i momeli dikenna. 21 I mensho, kay hayvell gar, te nay ačell lo gar ap i phoub, hounte merell har i firhe, ninna te his lo bravelo. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.