Debleskri gili 48 - O Debleskro Lab 2024 (Sinte-Manouche)O Debleskro foro 1 I gili yekestar dran i familya Korah. 2 O baro Devel, zorelo hi lo! Maro Devel, moldo hi lo, te sharas les an peskro foro, hoy hi pral ap koy berga, kay yob djivella. 3 Shoukar hi o foro ap i berga Sion. I barht hi i tseli phoubyake. An kava foro hi o Devel o baro ray. 4 Yob hi an i zorele khera an kava foro. Oun i menshe kote djinenn, te dell lo garda ap lende. 5 Bare raya dran vavar themma van khetne oun djan khetne pengre lourdentsa pash o foro pre. 6 Yon dikan kova oun lenge ačas o dji tardo. Len tapras i daar oun yon nashan penge. 7 Lengri daar his yaake baro, te trissan le. Lengri traash his har i traash i djouvyatar, kay lell li i ternepen. 8 Lengre kokale djan, har i bare shiffe phagenn, te djal i zorelo dourho pral o baro pani. 9 Yaake har mer kova shounam, yaake dikam les an o foro o baro Deblestar, kay hi o ray pral o bolepen oun i phoub. Yob rikrell o foro oun moukell les gar tele te djal an kek tsiro. 10 Maro Devel, kate an tiro kheer moukah menge tiro lačepen an o shero trouyel te djal. 11 Yaake baro har tiro lab, maro Devel, yaake baro hi tiro raylepen ap i tseli phoub. Tiro čačo vast hi pherdo čačepen. 12 Pral kova hi kol menshe ap i berga Sion barhtelo. Tou dal men maro čačepen. Doleske denn le gole i barhtyatar an i tsele forya an o them Youda. 13 Nashenn troul i berga Sion trouyel! Dikenn, kitse bare turme koy hi! 14 Denn yak ap i pre-čidde barra troul o foro oun i zorele khera an o foro, yaake te nay penenn kova t'mare čavenge. 15 Penenn lenge: Ava, kava Devel hi maro Devel kanna oun hako tsireske. Yob djal mentsa an maro tselo djipen. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.