Debleskri gili 45 - O Debleskro Lab 2024 (Sinte-Manouche)I gili o pirneske oun i pirnyake 1 I biyabeskri gili yekestar, kay hi dran i familya Korah. Koy gili hi o rayeske pral i gipangre, te givell pash o bashepen ap i shob-doryengri bashepaskri. 2 Miro dji hi pherdo shoukar laba i gilyake, hoy kamau te givap miro baro rayeske. Miri čip hi har i činepaskro yekestar, kay hayvell mishto laba te činell. 3 Tou hal shoukeder har i vavar menshe. Dran tiro mouy venn lače laba. Čačepah o Devel čivas peskri barht ap toute, te ačell li hako tsireske ap toute. 4 Čip tiro rharo ap tiri rig, tou čačo morsh, oun sike tiro raylepen oun zoor! 5 Besh tout ap tiro gray! Dja trouyel an o them oun kre o čačepen zoreles! Le i čorvelengro koova an tiro vast oun kre, te lenn le pengro čačepen! Yaake krell tiri čači moussi baro zorelo koova. 6 De tire fayle karye, te djan le an o dji kolendar, kay kourenn pen touha. Yaake perenna i vavar themma glan toute. 7 Miro Devel, tiri rayeskri beshepaskri ačell hako tsireske. Tou hal i čačo oun lačo ray pral tire menshende. 8 Tou kameh o čačepen, oun nay dikeh gar kolen glan tire yaka, kay o čilačepen krenna. Doleske rodas tout o Devel, tiro Devel, vin oun čoras boud barht pral toute vin, boudeder har pral hako vavar rayeste. 9 Tire ripya soungenn mishto pal myrrhe, Aloe oun Kassia. Bashepangre bashrenn touke an tire rayengre khera, hoy shoukar oun kouč kerdo hi. 10 I bare rayengre ča hi pash toute, oun ap tiri čači rig hi tiri pirni tardo, oun ap late hi o lačeder sonakay. 11 Shoun miri čay! Dik oun shoun mishto: Biste tire menshen oun tiri tseli familya! 12 Tou hal yaake shoukar, te kamell tout o baro ray. Yob hi tiro ray. Doleske dja ap i čanga glan leste! 13 I menshe dran o foro Tirus venn pash toute oun anenn touke shoukar koova. I bravele dran o tselo them venna, oun rodenn te dikess kamles ap lende. 14 I baro rayeskri čay vell dren, shoukar oun raylo kerdo, oun an-rido an sonakangre ripya. 15 Pral i kouč stakepangre anenn le lat pash o baro rayeste. Oun pal late djan kol terne ča, lakre mala, kolen anenn le pash toute. 16 Har djan le an o baro rayeskro kheer, denn i menshe gole i barhtyatar. 17 Miro ray, mou vell ko tsiro, kay beshenn tire morsh čave ap o rayeskri beshepaskri, kay tire phoure dada beshdo his; oun tou kreh len rayen pral i tseli phoub. 18 Me kamau toutar te rakrell, te prindjrenn tout ninna kol menshe, kay pal mende venna. Yaake sharenn tout i menshe an hake themma kanna oun hako tsiro. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.