Debleskri gili 44 - O Debleskro Lab 2024 (Sinte-Manouche)

Maro Devel, čival tou men pale?

¹ I gili o rayeske pral i gipangre. Kay gili hi yekestar dran i familya Korah.

² Maro Devel, mare kandentsa shounam mer, har mare phoure menge penan, hoy tou kral an lengre divessa glan i rah tsiro.

³ Tou tradal tiro vasteha i vavar menshen vin dran lengro them, oun dal ko them mare phourende. Kol vavar menshen dal tou paash, te nay djivan mare phoure an ko them.

⁴ Yon lan o them gar dren pengre rharentsa, vitar gar pengri zoryah. Na-a! Kova kras tiri čači moussi oun tiri zoor. Tou hals pash lende oun dikal kamles ap lende.

⁵ Tou hal miro baro ray, miro Devel. Tou hal kova, kay krell, te venn o Yakobeskre čave o zorleder an o kourepen.

⁶ Khetne touha vitsrah mer kolen ap i phoub, kay kourenn pen mentsa. Tiri zoryah stakrah mer kolen paash, kay hadenn pen ap mende.

⁷ Me djinau, miro bogo krell man gar zoreles, oun miro rharo nay lell man gar vin dran i čilače vasta.

⁸ Tou hal kova, kay lell men vin dran i čilače vasta. Oun tou kreh kolen tikno, kay kamenn menge čilačepen.

⁹ Hako dives ham barhtelo pral toute, maro Debleste, oun sharah tout kanna oun hako tsiro.

¹⁰ Kanna čival men pale oun vitsral men an i ladj. Tou djah gar mare lourdentsa an o kourepen.

¹¹ Tou moukal men pale te djal glan kolende, kay kouran pen mentsa. Yaake nay čoran kolla mare koola, kay pral mende van.

¹² Har firhe, hoy venn maredo, dal tou men pre. Oun an i tsele themma trouyel tradal tou men, yaake te ačam gar khetne.

¹³ Hi yaake har te bikrals tire menshen čičeske, oun lals gar boud love lenge dren, har bikral len.

¹⁴ Tou kral, te hounte ladjas men glan i menshende, kay djivenn an i themma troul mende; yon sanenn pral mende oun praasenn men.

¹⁵ I menshe an vavar themma rakrenn laba sapaske pral mende, oun čivenn pengre shere yek rigyatar ap i vavar pal mende.

¹⁶ O tselo dives hi miri ladj glan mande, oun miro mouy rhačrell glan ladj.

¹⁷ Me shounau, har sanenn le pral mende oun praasenn men, oun hounte dikap kolen, kay menge čilačepen kamenn oun menge o djipen phares krenn.

¹⁸ Kava lauter vas pral mende, ninna te bistram tout gar oun kram, hoy tou mentsa vin kral.

¹⁹ Mare djia moukan tout gar, vitar gar djan mare herya tiro dromestar tele.

²⁰ Fothe kram kova gar, hi kova yaake, har te dals tou men khetne, oun moukals men mank divye djoukle te djivell. Kek momeli hi glan mende.

²¹ Bistrams mer tout, maro Debles, oun mangams i vavar debles an,

²² palle djinals tou kova. Tou dikeh, hoy pash hakeneste an o dji khatemen hi, oun hoy kek vavar djinell.

²³ Tire menshe ham mer. Doleske vah mer o tselo tsiro moulo dino, har vams firhe, hoy venn maredo.

²⁴ Ste pre! Hoske soveh tou, mo ray? Ste pre oun čip men gar pale hako tsireske!

²⁵ Hoske dikeh tou gar ap mende? Bistral tou, har djoungeles menge djala, har phares yon menge o djipen krenna?

²⁶ An i čik ham vitsedo. Oun mer nay stah gar pre.

²⁷ Ste pre oun ab ap mari rig! Le men dran i čilače vasta vin! Mer dikah ap tiro lačepen.