Debleskri gili 42 - O Debleskro Lab 2024 (Sinte-Manouche)

Miro Devel, miro dji nashell pal toute

¹ I gili yekestar, kay hi dran i familya Korah. Kay gili hi o rayeske pral i gipangre.

² Har i vesheskri bouzyat bari troush hi pal shila pani, yaake nashell miro dji pal toute miro Devel.

³ Ava, man hi troush pal o Debleste, pal ko djido Debleste. Kaana nay vau glan toute an tiro kheer, te dikap tout?

⁴ I vavar penenn ap mande hako dives: “Kay hi tiro Devel?” Doleske rovau o tselo dives oun haki rati; mire sva van miro pipen.

⁵ Miro dji phagell an mande, har moukau mange an miro shero trouyel te djal, har djom boud menshentsa ap o drom oun anom len an o Debleskro kheer. Ap o drom sharam les bari golyah, te parkras men pash leste, oun hams boud, kay givan leske gilya i barhtelo djiyeha.

⁶ Hoske rovell miro dji, oun hi yaake pharo an mande? Ap miro Debleste kamau te dikell. Me djinau, te vell i tsiro, kay sharau les, miro Debles, te vas lo ap miri rig.

⁷ Kanna, mo Devel, rovell miro dji. Doleske dikau ap toute kote, kay hom: an o them pash o pani Yordan, pash i berge Hermon oun Misar.

⁸ Tire panya perenn bari zoryah oun golyah tele. Yek baro pani pal o vavar djal pral mande vergel.

⁹ Pral o dives bičrell o baro Devel mange peskro lačepen, oun rati givau leske gilya, oun mangau o Debles, kay les miro djipen an o vast hi.

¹⁰ Me penau ap miro Debleste, kay hi mange har i zorelo kheer, kay nay khatrau man: Hoske bistral tou man? Hoske hounte rovap me? Kolla djan ap mande, kay mange o djipen phares krenna.

¹¹ Yon sanenn pral mande oun poučenn mandar hako dives: “Kay hi tiro Devel? Kay ačell lo?” Lengro praasepen hi mange har i merepaskro doukepen an mire kokale.

¹² Me penau mange: Hoske roveh tou, miro dji, oun hal yaake pharo an mande? Ap mo Debleste kamau te dikell. Me djinau, te vell i tsiro, kay sharau les, miro Debles, te vas lo ap miri rig.