Debleskri gili 41 - O Debleskro Lab 2024 (Sinte-Manouche)I mangepen ap o Debleste yekestar, kay nasselo hi 1 I gili o rayeske pral i gipangre. O David kras kay gili. 2 Barhtelo hi kova, kay dell yak ap kolende, kay gar zoreles hi. Ap ko dives, kay les i bibarht taprella, lell o baro Devel les vin. 3 O baro Devel rikrell peskre vasta pral leste, oun rikrell leskro djipen, oun krell, te djal leske mishto ap i phoub. Oun yob moukell les gar an i čilače vasta te perell. 4 O baro Devel dell les nevi zoor ap o nasslengro čiben, oun krell les sasto. 5 Me penom: “Baro Devel, kre tiro dji mange pre! Me anom doosh ap mande. Kre man sasto!” 6 Kolla, kay kamenn mange čilačepen, rakrenn djoungeles pral mande oun penenna: “Kaana merell lo, te vell leskro lab bistedo?” 7 Te vell yek lendar pash mande, te dikell lo pal mande, palle vell lo i čilačo djiyeha. Yob rodell i doosh, hoy nay anell lo ap mande pre. Te djal lo palle mandar vin, rakrell lo rhorhepen pral mande. 8 Kolla, kay kamenn mange čilačepen, čivenn pengre shere khetne, oun rakrenn djoungeles pral mande. 9 “I bibarht hi ap leste”, penenn le. “Koon yaake čiddo hi, stell bouder gar pre.” 10 Ninna miro lačeder maal, kova, kay mantsa khetne rhas, phoukras ap mande. 11 Tou, baro Devel, kre tiro dji mange pre! Hade man pale pre! Palle dau len lauter pale, hoy yon mange kran. 12 Mouk len gar pral mande te sal! Palle dikau, te dikeh tou lačes ap mande. 13 Me shounau ap toute miro tselo djiyeha. Doleske rikreh tou miro djipen, oun moukeh man te djivell pash toute hako tsiro. 14 Sharas o baro Debles, ko Debles pral o Israel, kanna oun hako tsiro. Amen! Ava, Amen! |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.