Debleskri gili 40 - O Debleskro Lab 2024 (Sinte-Manouche)Barhtelo hi kova, kay čivell peskro patsepen ap o Debleste 1 I gili o rayeske pral i gipangre. O David kras kay gili. 2 Miro tselo djiyeha dikom ap o baro Debleste, oun yob rissras peskro kand pash mande, oun shounas, har ap leste gole dom. 3 Yob hadas man vin dran i grufta, dran o merepen oun i čik, oun čivas mire pire ap i baro bar, te vap zoreles tardo. 4 An miro mouy čivas lo i nevi gili, i gili, hoy maro Debles sharell. Boud, kay dikenn kova, hayvenn, te hi o baro Devel o ray, oun yon patsenn ap leste. 5 Barhtelo hi ko mensho, kay rikrell pes ap o baro Debleste, oun djal gar kolentsa, kay hi pre-phourde oun rhorhene. 6 Miro baro Devel, har boud hi ko baro koova, hoy tou ap mende kral, hoy kek vavar nay krals, har tou kokres. Te kamoms pral kova lauter te rakrell, nay kroms kova gar, yaake boud hi kova. 7 Kol firhen oun ko rhapen, hoy i menshe touke anenna, kameh tou gar. Tou dal man kanda, te hayvap, hoy kameh: kek firhen, hoy i menshe touke rhačrenna, vitar kek, hoy marenn le, te less tou lengri doosh lendar krik. 8 Doleske penom touke: Ake hom. Me krau, hoy mandar činlo hi an o liil: 9 “Miro Devel, me kamau te krap o djiyestar, hoy tou kameh. Oun tiro lab hi an miro dji.” 10 Kote, kay lauter khetne venna, penau me lenge, kay tou leh vin dran o čilačepen. Miro mouy pandau me gar. Tou, baro Devel, djineh kova. 11 Me rikrau man gar pale te penap lenge, hoy tou mendar kameh, oun kay tou rikreh tiro lab, oun leh i doosh krik. Oun me rikrau man gar pale, te rakrap pral tiro lačepen oun čačepen kote, kay boud menshe khetne venna. 12 Baro Devel, mouk tiro dji hako tsiro mange pre te vell! Tou kameh man oun hal mange lačes. Doleske rike tiro vast pral mande hako tsiro! 13 Haki rigyatar vas bibarht ap mande, yaake boud, te djinau gar, har boud kope i bibarht man das. Miri doosh tapras man, oun hi yaake boud, te nay dikap lat gar lauter. O čilačo koova, hoy krom, hi boudeder har mire balla ap miro shero, oun miro dji hi dareno. 14 Baro Devel, dik lačes ap mande, oun le man vin dran o čilačepen! Ab sik ap miri rig! 15 Kre, te ladjenn le pen, oun lenn i lolo shero, kolla lauter, kay kamenn man moulo dell! Kre len tikno, te ladjenn le pen, kolla, kay hi barhtelo pral miri bibarht! 16 Mou vell ladj oun daar ap lende, kay pral mande sanenn oun gole denn: “Ava, Ava, Ava!” 17 Kolla lauter, kay tout rodenna, mou venn le barhtelo pral toute oun givenn i barhtyatar! Kolla, kay mangenn toutar, te less len vin dran o čilačepen, mou penenn le hako tsiro: “Sharedo vell o baro Devel!” 18 Me hom čorvelo. Oun man hi kek zoor an mande. Miro Ray, biste man gar! Tou hal kova, kay vell ap miri rig oun lell man vin dran o čilačepen. Am sik miro Devel! |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.