Debleskri gili 4 - O Debleskro Lab 2024 (Sinte-Manouche)O Devel dell barht an miro dji, ninna te vell djoungeles pral mande rakedo 1 I gili o rayeske pral i gipangre, te givell pash o bashepen ap i doryengri bashepaskri. O David kras kay gili. 2 Shoun man, te dau ap toute gole! Miro Devel, kay deh man čačo! An miri daar kral tou miro dji zoreles. Ab lačes ap mande oun shoun har me tout mangau! 3 Morshale, har rah tserdenn t'mer miro lab an i čik! T'mer rodenn pal kova, hoy či moldo hi, oun kamenn o rhorhepen. 4 Dikenn oun hayvenn: O baro Devel rodas kolen vin, kay kamenn les o tselo djiyestar. O baro Devel shounell man, te dau ap leste gole. 5 Te vell i rholi an t'mende pre, palle anenn kek doosh ap t'mende! Rakrenn an t'mare djia, te han an t'maro čiben čiddo, oun rakrenn kek lab! 6 Denn kova o Debleste, hoy mishto oun čačo hi! Oun patsenn, te krell o baro Devel lauter mishto! 7 Boud penenna, koon moukell men lačepen dikell? Tou, baro Devel, mouk tiro lačepen har i momeli pral mende pre te djal! 8 Tou kral miro dji barhtleder har o dji kolendar, kolen boud djob oun mool hi. 9 Me čivau man tele oun sovau kek daryah. Tou kokres, baro Devel, deh yak ap mande, te nay krell mange kek i čilačo koova. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.