Debleskri gili 39 - O Debleskro Lab 2024 (Sinte-Manouche)

Miro Devel, sike man, har tikno miro djipen hi!

¹ I gili o rayeske pral i gipangre, o Yedoutoun. O David kras kay gili.

² Me penom mange: Me dau ap mande yak, te rakrap kek čilačepen. Me čivom miro vast ap miro mouy yaake rah har o čilačo his troul mande.

³ Oun me rikrom miro mouy, oun homs pokones. Har penom či, vitar kek lačo lab, vas i daar an mande baro.

⁴ Oun miro dji rhačras i doukatar, oun miro shero vas tato, oun me nay rikrom man bouder gar pale, oun penom:

⁵ Baro Devel, sike mande, har sik o djipen trouyel hi, oun kay miro merepen vella, te djinap, te nay ačau gar hako tsiro kay.

⁶ Miro djipen hi yaake tikno har i vast bourhlo hi. Kova hi har či pash toute. Har zorelo i mensho ninna tardo hi, leskro djipen hi har i dourho.

⁷ O mensho vell oun djal pale har i souni. O mensho boudrella boud čičeske oun krell boud gole troul či. Yob anell peske boud bravlepen khetne, oun djinell gar, koon kova lella.

⁸ Kanna, miro ray, hoy vell ap mande? Me dikau ap toute,

⁹ te less man vin dran miri tseli doosh! Ma mouk i dinelen pral mande te sal!

¹⁰ Me penau bouder či. Miro mouy ačell pandlo. Toutar vell kova, hoy pral mande vas.

¹¹ Me mangau tout: Le tiro vast mandar krik. Te deh tou man doureder, hounte merap.

¹² Tou te deh o menshes i phagi, te anas lo doosh ap peste, palle djal lo yaake paash har i ripen, hoy rhalo vell i kirmestar. Ava, o mensheskro djipen hi či bouder har i dourho.

¹³ Baro Devel, shoun miro mangepen! Oun shoun, har dau ap toute gole! Dik mire sva oun rake mantsa! Me hom gar khere ap kay phoub, djivau har i vi-themari pash toute, yaake har ninna mire phoure djivan.

¹⁴ Mouk man kanna, te lap nevi zoor, bis te hounte merap, oun me gar bouder hom.