Debleskri gili 38 - O Debleskro Lab 2024 (Sinte-Manouche)Miri doosh djal pral miro shero 1 I gili o Davidestar, te bistrell les o Devel gar. 2 Baro Devel, ma činge ap mande an tiri rholi! Ma de man i phagi an tiri rholi! 3 Tou dal karye ap mande oun doukral man, oun tiro vast das man ap i phoub tele. 4 Ap miro mass hi bouder či sasto dran tiri rholi. Ninna mire kokale doukrenna. Dran miri doosh vas kova ap mande. 5 Miri doosh vas yaake bares an mande, te djal li pral miro shero. Me nay hidjrau lat gar, yaake pharo hi li. 6 Miro boud doukepen khandella, oun i djelto pani djal dran o doukepen vin. Dran miro dinlepen vell kova ap mande. 7 Me nashau bango i doukatar, har te loms dava. Oun o tselo dives rovell miro dji. 8 An mande rhačrell i tatepen, oun či ap mande hi sasto. 9 Kek zoor hi bouder an mande, oun me hom phagedo. Miro dji hi yaake dareno, kay dau gole i doukatar. 10 Miro ray, tou djineh, hoy me miro djiyestar kamau, oun miro tselo ropen hi gar khatedo glan toute. 11 Miro dji djal sikeder. Miri zoor moukas man. Oun mire yaka nashran pengri zoor. 12 Mire mala oun mire menshe darenn glan miro nasslepen. Oun kolla, kay pash mande djivenna, hi dour mandar krik tardo. 13 Kolla, kay kamenn man te marell, čivenn mange dorya vin, te perap dren. Kolla, kay rodenn miri bibarht, rakrenn khetne, hoy nay krenn le mantsa. O tselo dives rodenn le pal kova, har nay rhorhenn le man. 14 Me krau har nay shounoms či, oun krau miro mouy gar pre har yek, kay bouder gar nay rakrell. 15 Ava, me vom har i morsh, kay bouder či shounell, kay les bouder kek lab an o mouy hi, hoy yob pale nay rakrell. 16 Čačepah, me čivau miro tselo patsepen ap toute, baro Devel, te rakress tou mantsa, mo ray oun mo Devel. 17 Oun me penom touke: “Ma mouk len te sal pral mande!” Me te peroms, sharans yon pen pral mande. 18 Hi bouder gar dour, te perap, oun mire douka hi hako tsiro glan mire yaka. 19 Doleske penau touke, havo čilačo koova me krom, oun miri doosh khaytell man. 20 Kolla, kay mange čilačepen kamenna, hi zoreles oun hi boud. Boud rhoyrenn pen ap mande, ninna te krom len či. 21 Ava, yon denn man čilačepen ap o lačepen pale. Oun čingrenn ap mande, kay krom o lačepen. 22 Ma biste man, baro Devel! Miro Devel, ab gar dour mandar! 23 Ab sik ap miri rig! Miro ray, tou hal kova, kay man dran lengre vasta vin lell. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.