Debleskri gili 37 - O Debleskro Lab 2024 (Sinte-Manouche)

I barht i čilačendar ačell gar

1 I gili o Davidestar.

¹ I gili o Davidestar. Ma rhoye tout pral i čilačende! Te djal kolenge mishto, kay krenn čilačo koova, ma zilve ap lende!

² Yon hi har khass, hoy merell, te dell kek brishin, oun har o zenlepen, hoy ačell gar.

³ Dik ap o baro Debleste, te krell lo touke lačepen! Oun kre, hoy mishto hi! Ač an o them, oun djib kolestar, hoy tire vastentsa boudral!

⁴ Rode tiri barht pash o baro Debleste, palle dell yob tout lauter, hoy tiro dji kamella.

⁵ De tiro djipen an o vast o baro Deblestar, oun pats ap leste! Palle krell yob lauter mishto.

⁶ Oun yob moukell tiro čačepen pre te djal har o kham, oun moukell tiro čačepen diklo te vell har o kham mashkral o dives.

⁷ Ač pokones oun dik ap o baro Debleste, te vell lo ap tiri rig! Ab gar rhoyedo pral koleste, kay leske mishto djala, ninna te hi les čilačepen an o shero.

⁸ Mouk tele i rholyatar! Ma rhoye tout pral o čilačepen, hoy i vavar krenna! Kova nay anell tout yaake dour, te kreh tou ninna o čilačepen.

⁹ I tsiro vella, kay hi bouder kek čilače ap kay phoub. Kolla, kay ap o baro Debleste dikenna, te vell leskro tsiro, kolenge hi palle o them.

¹⁰ An i tikno tsiro hi o čilačo bouder gar koy. Oun kote, kay yob djivas, hatseh les bouder gar.

¹¹ I čorvele lenn ko them. Kote hi len boudeder barht har doha.

¹² O čilačo kamell midjak koova te krell ap koleste, kay an o čačepen tardo hi, oun sikrell leske i danda.

¹³ O baro Devel sal pral leste, yob dikell leskro dives te vell.

¹⁴ I čilače lenn pengro rharo, oun hadenn pengro bogo, te marenn le i čorvelen oun kolen, kay nay kourenn pen gar, ninna lauteren, kay djan ap o čačo drom.

¹⁵ Yon denn pen pengro rhareha kokres an pengro dji čourye, oun lengre boge venna phagedo.

¹⁶ Ko tikno bravlepen, hoy koleskro hi, kay an o čačepen tardo hi, hi feteder har ko baro bravlepen boud čilačendar.

¹⁷ Kolengri zoor vell phagedo. O baro Devel rikrell kolen, kay an o čačepen tardo hi.

¹⁸ O baro Devel prindjrell i divessa kolendar, kay ap leste shounenna pengro tselo djiyeha, oun lengro them ačell lenge hako tsireske.

¹⁹ An i čilačo tsiro moukell lo len gar, oun an i boklo tsiro dell yob len doha te rhal.

²⁰ I čilače merenna, oun kolla, kay o baro Debles gar kamenna, hi har kol shoukar divye bloume, hoy sik tele merenn, oun djan penge har i yagakro dourho, hoy pre djal.

²¹ O čilačo patsell peske love, oun playsrell gar pale. Kova, kay an o čačepen tardo hi, krell peskro dji pre oun della.

²² Kol menshe, ap kolende o baro Devel peskri barht čivas, lenn ko them. Kolla, ap kolende o baro Devel i bibarht čivas, kolendar ačell kek.

²³ O baro Deblestar vell, te djal i morsh o čačo drom. Pral koleste hi lo barhtelo.

²⁴ Ninna te perell lo, ačell lo gar čiddo, o baro Devel rikrell les ap peskro vast.

²⁵ Me homs terno oun vom phouro. An ko tselo tsiro dikom me kekes kokres mouklo, kay an o čačepen tardo hi; oun kekes leskre čavendar dikom, kay hounte mangas peske maro.

²⁶ O tselo tsiro krell yob peskro dji pre oun patsella, oun ap leskre čavende vell o Debleskri barht diklo.

²⁷ Mouk o čilačepen pal toute, oun kre o lačepen! Palle nay ačeh hako tsireske khere an o them.

²⁸ O baro Devel kamell o čačepen oun moukell peskre menshen gar kokres. Hako tsiro dell yob yak ap lende. Kolla, kay kamenn o Deblestar či te djinell, merenna, ninna lengre čave oun kolengre čave.

²⁹ Kolla, kay an o čačepen tardo hi, lenn o them, oun djivenn kote hako tsireske.

³⁰ Gosvepen vell dran o mouy i lačo menshestar, oun leskri čip rakrell o čačepen.

³¹ O Debleskre laba hi an leskro dji. Oun yob perell gar o čačo dromestar tele.

³² O čilačo lell koles an o yak, kay an o čačepen tardo hi, te hatsell lo i drom, te nay dell lo les moulo.

³³ O baro Devel moukell les gar an o čilačeskro vast. Te anenn le les glan i čačepangre, nay anenn yon kek doosh ap leste pre.

³⁴ Dik ap o baro Debleste, te vell lo ap tiri rig! Oun ač ap leskro drom! Palle hadell lo tout oun dell tout ko them. Oun tou dikeh, har venn i čilače maredo.

³⁵ Me dikom i čilačes, kay hadas pes pral i vavarende, oun kras pes bourhlo har i baro zorelo rouk.

³⁶ Oun har vom i vavar kopo koy, his lo bouder gar koy. Oun me rodom les, oun hatsom les gar.

³⁷ Kre yaake har kova, kay shounell ap o Debleste peskro tselo djiyeha! Oun djib yaake har kova, kay vell kek doosh ap leste hatslo. Savo mensheske djal mishto an ko tsiro, hoy vella.

³⁸ Kolla, kay o Deblestar tele peran, venna lauter moulo dino. Oun i čilačendar pengre čaventsa oun čavengre čaventsa ačell kek pral.

³⁹ O baro Devel vell ap i rig kolendar, kay ap leste rikrenna. An i pharo tsiro dell lo len zoor.

⁴⁰ Oun o baro Devel hi pash lende tardo, oun lell len vin, ava, dran o vast i čilačendar lell lo len vin. Yon nashenn pash leste, oun yob dell garda ap lende.