Debleskri gili 36 - O Debleskro Lab 2024 (Sinte-Manouche)

O Debleskro lačepen hi baro

¹ I gili o rayeske pral i gipangre. O David, ko baro Debleskro boudepaskro, kras kay gili.

² O čilačepen hi o čilačeske an o rat. Yob kamell o Deblestar či te djinell oun darell lestar gar.

³ An peskre yaka hi kova yaake shoukar, hoy lo krella, te hayvell lo gar, kay kova i doosh hi, kay hounte rikrals pes lo latar pale.

⁴ Či har midjak oun rhorhene laba venn dran leskro mouy vin. Lačo koova hayvell lo bouder gar te krell.

⁵ Te hi lo ap peskro čiben čiddo, djal o čilačepen an leskro shero trouyel. Oun yob rikrell zoreles ap i drom, hoy gar mishto hi, oun rikrell pes gar pale, te krell lo o čilačepen.

⁶ Baro Devel, tiro lačepen hi yaake baro har o bolepen. Oun tiro kamlepen ap tire menshende djal bis pash i volke.

⁷ Tiro čačepen djal yaake pre har i bare berge. Oun i čače laba, hoy tou vin rakreh, djan dour tele har o baro pani. Baro Devel, tou deh i menshen oun i firhen kova, hoy len hounte vell.

⁸ Har raylo hi tiro lačepen, miro Devel! I menshe venn pash toute, te rikress tire vasta pral lende, har i čirklo rikrell peskre moussya pral peskre terne.

⁹ Tou čoreh pral lende lačo koova dran o bravlepen an tiro kheer. Oun deh len tiro lačepen te piyell, har te piyans le lačo pani.

¹⁰ Tou hal o djido pani, hoy nevo djipen della. Tou hal i momeli maro djipaske.

¹¹ Čip tiro lačepen ap kolende, kay tout prindjrenna, oun mouk tiro čačepen te vell kolenge, kay shounenn ap toute o tselo djiyestar.

¹² Mouk i pre-phourden gar te stakrenn le man tele. Kre te nay tradenn man i čilače gar dran miro kheer vin.

¹³ Dikenn, i čilače peran! Yon hi čiddo ap i phoub, oun nay stenn gar bouder pre.