Debleskri gili 35 - O Debleskro Lab 2024 (Sinte-Manouche)Miro Devel, de man miro čačepen! 1 I gili o Davidestar. 1 I gili o Davidestar. Baro Devel, le miro koova an tiro vast oun činge kolentsa, kay mantsa čingrenna! Koure tout kolentsa, kay kourenn pen mantsa! 2 Le tiro shilto an o vast, rib tiro sasterno ripen ap toute! Oun ab ap miri rig! 3 Le tiro rharo oun tiro tover, oun čip tout kolenge an o drom, kay man palla lenna! Pen mange: “Me hom ap tiri rig.” 4 Mou vell ladj oun praasepen ap kolende, kay kamenn miro merepen! Mou venn le pale-čiddo oun ladjenn pen, kolla, kay rodenn miri bibarht! 5 Mou tradell len o baro Debleskro bolepaskro krik, yaake te venn le har phouss, hoy i dourho krik phourdell! 6 Lengro drom te vell kalo oun sapeno, te dikenn le či oun perenn le! Oun o baro Debleskro bolepaskro te lell len palla! 7 Yon čivan mange i netsa vin, te perap dren, ninna te krom me lenge či. Čičeske hadan le mange i rheb vin, te perap dren. 8 Mouk i bibarht pral lende te vell yaake sik har i dap! Mou perenn le an koy netsa, hoy yon čivan mange. Mou perenn le an koy rheb, hoy yon hadan mange vin! 9 Miro dji mou givell oun bashrell, te las man o baro Devel dran lengre vasta vin. 10 Lauter, hoy an mande hi, penell: Baro Devel, koon hi yaake har tou? Tou leh o čorveles vin dran i vasta kolendar, kay zorleder hi har yob. Tou leh koles, kay bibarhtelo oun čorvelo hi, vin dran i vasta kolendar, kay čoran leskro koova. 11 Rhorhene venna, oun anenn doosh ap mande. Yon poučenn mandar, hoy me gar djinau. 12 Me homs ap lende lačes. Yon denn man čilačepen pale, oun krenn, te vap kokres. 13 Har yek lendar nasselo his, rivom ropaskre ripya ap mande, rhom či oun bokom leske, oun pale te pale mangom o Debles leske, 14 har te vals lo miro maal oun phraal. Mange vas ropaske yaake har te vals lo miri day. 15 Hi vavarčandes lentsa. Har me perom, stan le i barhtyatar, oun čivan pen khetne, te djan le ap mande pre. Depangre van, kay prindjrom gar, oun dan man dava oun moukan gar tele. 16 Khetne kol čilačentsa praasan le man oun sikran mange pengre danda. 17 Ray, har rah kameh tou kova te dikell oun kreh či? Le miro djipen dran i vasta kolendar vin, kay peran pral mande har divye firhe. 18 Palle kamau man pash toute te parkrell kote, kay boud menshe khetne venna an o Debleskro kheer. Ava, glan i tsele menshende sharau tout. 19 Ma mouk, te sanenn kolla pral mande, kay kamenn mange čilačepen, ninna te krom me len či. Ma mouk len i yakentsa te dell pal mande! 20 Yon rakrenna, hoy doukepen anella. Oun anenn rhorhepen pre ap kolende, kay djivenn kek čingepah an kava them. 21 Pengre mouya krenn le dour pre oun denn gole ap mande: “Ha! Ha! Koleske dam les!” 22 Baro Devel, tou dikal kova. Rike tout gar pale, rake! Miro ray, ma ab kanna dour mandar krik! 23 Hade tout! Ste pre, oun de man miro čačepen! Le miro koova an tiro vast, mo Devel oun mo ray! 24 Baro Devel, tou hal an o čačepen tardo. De man miro čačepen! Miro Devel, mouk len gar pral mande te sal! 25 Mouk len gar an pengre djia te penell: “Dik! Men hi, hoy kamam. Kanna rhah mer les djides!” 26 Kre, te ladjenn le pen, oun nay hadenn pengro shero gar pral, kolla lauter, kay hi barhtelo pral miri bibarht! Mou vell praasepen oun ladj ap lende, kay hadenn pen pral mande. 27 Kre, te stenn oun sanenn i barhtyatar kolla, kay kamenn, te lap miro čačepen. Mou penenn le pale te pale: “Har baro hi o baro Devel, kay hi yaake lačo ap peskro boudepaskro!” 28 Me kamau te rakrap pral tiro čačepen, oun sharau tout hako dives. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.