Debleskri gili 34 - O Debleskro Lab 2024 (Sinte-Manouche)O Devel rikrell peskre vasta pral peskre menshende 1 I gili o Davidestar, hoy yob givas, har yob pash o Abimelek kras, har te vals lo dinelo, oun kova les krik tradas. 2 Me kamau o baro Debles te sharell hako tsireske, oun kamau gar tele moukell, te parkrap man pash leste. 3 Kova, hoy yob lauter kras an miro djipen, kamau me te sharell. Mou shounenn kova kolla, kay tele rikedo hi, oun venn barhtele! 4 Givenn mantsa gilya o baro Debleske! Krenn leskro lab mantsa khetne baro! 5 Me rodom o baro Debles, oun yob shounas man. Yob las man vin dran miri tseli daar. 6 Kolla, kay ap leste dikenna, lengre yaka venna har i momeli, oun yon hounte ladjenn pen gar. 7 Ake hi yek, kay gole das ap o baro Debleste, har leske djoungeles djas, oun yob shounas les oun las les vin dran lauter, hoy leske o djipen phares kras. 8 O baro Debleskro bolepaskro hi troul kolende, kay djivenn o baro Debleha, oun lell len vin dran i bibarht. 9 Hayvenn oun dikenn har kamles o baro Devel hi! Barhtelo hi kova, kay pes ap leste rikrella. 10 T'mer, kay o baro Debleskre menshe han, djivenn leha! Kolen, kay djivenn leha, hi lauter o djipaske. 11 I bare divye margodje hatsenn gar hako dives doha rhapaske oun hounte bokenna. Kol menshen, kay rodenn o baro Debles, hi lauter doha djipaske. 12 Avenn, t'mer čave oun shounenn, hoy me penau! Me kamau t'men te sikrell, har djivenn t'mer o baro Debleha. 13 Kamenn t'mer te djivenn i shoukar oun rah djipen? 14 Palle denn garda ap t'mari čip, te rakrell li kek čilačepen oun kek rhorhepen! 15 Rikrenn t'men pale dran o čilačepen oun krenn o lačepen! T'mari tseli zoryah krenn lauter, te vell kek čingepen mank t'mende! 16 O baro Devel dikell ap kolende, kay an o čačepen tardo hi. Oun leskre kanda shounenn len, te denn le gole. 17 O baro Devel hi gar kolentsa, kay o čilačepen krenna, oun krell, te venn le sik bistedo pal lengro merepen. 18 Te denn kolla ap leste gole, kay rikrenn ap leste, palle shounell len o baro Devel, oun lell len vin dran lengri tseli bibarht. 19 O baro Devel hi pash kolende, kay lengro dji phagedo hi. Oun kolenge, kay dikenn bouder kek momeli an pengro djipen, hi lo ap i rig tardo. 20 Boud douka venna ap koleste, kay an o čačepen tardo hi. Dran kova lauter lell o baro Devel les vin. 21 Yob dell yaake yak ap leste, te vell kek kokalo lestar phagedo. 22 O čilačo merell dran peskro čilačepen. Oun kolla, kay kamenn čilačepen ap i lačende te anell, lenna pengri phagi. 23 O baro Devel rikrell peskre boudepangre ap o djipen. Oun ap lauterende, kay rikrenn pen ap leste, vell kek doosh anlo. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.