Debleskri gili 33 - O Debleskro Lab 2024 (Sinte-Manouche)I gili, hoy sharell kova lauter, hoy o Devel krell 1 T'mer, kay an o čačepen tardo han, denn gole i barhtyatar pral kova, hoy o baro Devel krell. Hi mishto, te sharenn les, t'mer, kay t'maro tselo djiyeha ap leste shounenn! 2 Parkrenn t'men pash o baro Debleste, oun bashrenn leske ap doryengre bashepangre! Givenn leske gilya, oun bashrenn leske ap i bashepaskri i deesh doryentsa! 3 Givenn leske i nevi gili! Krenn shoukar bashepen oun denn gole i barhtyatar! 4 O baro Debleskro lab hi čačo. Oun kova, hoy krell lo, hi zorelo. 5 Yob kamell i čače dromma oun i čače laba. Oun i tseli phoub hi pherdo lačepen o baro Deblestar. 6 Dran o lab o baro Deblestar vas o bolepen kerdo. Dran o dourho, hoy dran leskro mouy djas, van i tsele bolepangre momlia kerdo. 7 Yob rikrell i bare panya khetne har an i gono, oun čivell i bare panya khetne har an i kheer. 8 I tseli phoub hounte darell o baro Deblestar, hakeno, kay ap i phoub djivella, hounte penell leske: “Tou hal o Devel.” 9 Yob te rakrell, palle vell, hoy yob penas, yaake har lo kova penas, yaake hi kova koy tardo. 10 O baro Devel moukell kova gar te vell, hoy kol menshe an i vavar themma kamenn te krell. Lenge čivell lo barra an o drom. 11 Kova, hoy o baro Devel kamell te krell, ačell zoreles tardo, oun kova, hoy les an peskro dji hi, te krell lo, ačell yaake rah har menshe koy hi. 12 Barhtele hi kol menshe, kolengro Devel o baro Devel hi, kol menshe, kay yob peske vi-rodas, te venn le leskre menshe. 13 O baro Devel dikell tele dran o bolepen, oun dikell i tsele menshen. 14 Yob hi beshdo ap peskri rayeskri beshepaskri oun dikell ap lauterende, kay ap i phoub djivenna. 15 Yob čivell lenge an o dji, hoy te krenn le, oun dell yak ap lauter, hoy yon krenna. 16 I baro ray boud lourdentsa vell gar dran peskri zoor o zorleder an o kourepen. Oun i čačo morsh, koles boud zoor hi, vell gar dran peskri zoor vin lino dran o kourepen. 17 Hi vitar gar i graya, kay nay lenn vin dran o kourepen, ninna te hi len bari zoor. 18 Kova hi o baro Devel, kay dell garda ap kolende, kay djivenn leha, kolla, kay dikenn ap leste, te vell lo lenge lačo, 19 oun lell lengro djipen dran o merepen vin. Ninna te vell bari bok pral o them, merenn le gar. 20 Mer rikrah men ap o baro Debleste maro tselo djiyeha. Yob vell ap mari rig, oun rikrell peskro vast pral mende. 21 An leste hi maro dji barhtelo, oun mer rikrah men ap leste, kay hi kokres o Devel. 22 Dik, har mer dikah ap toute, baro Devel, yaake mouk tiro lačepen pral mende te vell! |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.