Debleskri gili 32 - O Debleskro Lab 2024 (Sinte-Manouche)

O Devel bistras miri doosh

1 Laba o Davidestar.

¹ Laba o Davidestar. Barhtelo hi kova, koleske o čilačepen, hoy ap leste his, krik lino hi, oun leskri doosh bistedo hi.

² Barhtelo hi ko mensho, koneske o baro Devel i doosh gar glan-rikrell, oun an koleste kek rhorhepen hi.

³ Har kamom miri doosh gar vin te rakrell, nashrom me miri zoor oun rovom hako dives.

⁴ Miro Devel, dives oun rati his tiro vast phares ap mande čiddo, oun miri djipaskri zoor djas yaake peske mandar, har o zenlepen peskri zoor nashrella an o tato niyal.

⁵ Doleske penom me touke miri doosh, oun khatrom gar o čilačepen, hoy me krom. Me penom mange: “Me kamau o baro Debleske ko čilačepen te penell, hoy krom.” Oun tou lal miri doosh mandar krik.

⁶ Doleske mangenn tout lauter kolla an, kay tiro hi, an ko tsiro, kay taprell len i daar. Palle, te venn i bare panya, nay taprenn le len gar.

⁷ Pash toute nay khatrau me man, glan kova, hoy mange daar krell. Doleske sharau tout i barhtelo djiyeha pral kova, har tou man vin lal dran i bibarht.

⁸ “Me kamau toute te sikrell havo drom tou hounte djas, oun penau touke, har tou les djas, oun dau yak ap toute,” penell o baro Devel.

⁹ “Ma avenn dinele har i graya, oun i maultikre bourike! Lenge hounte čivess i shello trouyel oun i saster an o mouy, te nay aness len kote, kay kameh.”

¹⁰ Ap i čilače menshende venn boud douka. Koon čivell peskro tselo patsepen ap o baro Debleste, troul koleste čivell yob peskro lačepen.

¹¹ T'mer, kay an o čačepen tardo han, avenn barhtelo pral t'maro baro Debleste! Moukenn t'mare djia san oun bashrenn! Denn gole i barhtyatar, t'mer lauter, kay shounenn o tselo djiyeha ap o Debleste.