Debleskri gili 31 - O Debleskro Lab 2024 (Sinte-Manouche)Miro Devel, me čivau miro djipen an tire vasta 1 I gili o rayeske pral i gipangre. O David kras kay gili. 2 Baro Devel, pash toute vau, te rikress tire vasta pral mande. Mouk man gar čičeske pash toute te vell! Tou hal lačo oun čačo. Doleske le man dran i čilače vasta vin! 3 Shoun, har dau ap toute gole, oun ab sik ap miri rig! Ab mange har i baro zorelo bar, kay nay khatrau man! Ab mange har i zorelo kheer, te nay hatsell man kek! 4 Ava, tou hal mange har i zorelo kheer ap i baro bar. Dja mantsa oun an man ap i drom, kay kek nay taprell man, te vell tiro lab sharedo. 5 Tserde man dran koy netsa vin, hoy kran le, te perap dren. Tou hal o zorelo, kay ap miri rig hi. 6 Me dau man an tire vasta. Tou leh man dran i čilače vasta vin, baro Devel. Tou hal i Devel, kay rikrell peskro lab. 7 Me nay dikau kolen gar glan i yaka, kay mangenn vavar deblen an. Me rikrau man ap toute, baro Devel. 8 Miro dji sal oun me stau i barhtyatar pral tiro lačepen. Tou dikal, har mange djoungeles djas, oun djinal, har pharo miro djipen his. 9 Tou dal man gar an i vasta kolendar, kay mange čilačepen kaman. Kanna nay djau, kay me kamau. 10 Baro Devel, ab lačes mange! Me djivau an i daar, mire yaka hi pesso o ropastar. Oun kek zoor hi bouder an mande. 11 I daar rhas miro djipen pre, oun mire bersha his pherdo ropen. Miri doosh lell miri zoor mandar, yaake te djap bango. 12 Kolla, kay mange čilačepen kamenn, san pral mande. Gomme djoungleder kran mange kolla, kay djivenn langs mande. Mire mala trashenn mandar. Te dikenn le man ap o drom, nashenn le penge mandar. 13 Boud bistran man, har te voms moulo oun paskedo. Lenge hom har i phagedo čaro, hoy krik vitsedo vas. 14 Me shounau, har rakrenn le djoungeles pral mande. I traash hi troul mande. Yon čivenn pen khetne, oun rodenn i drom, har te denn le man moulo. 15 Baro Devel, me rikrau man ap toute. Miro Devel hal tou. 16 Miro djipaskro tsiro hi an tire vasta. Le man vin dran i vasta kolendar, kay mange čilačepen kamenn, oun man palla lenn. 17 Dik lačes ap mande! Me hom tiro boudepaskro! Ab kamles mange oun tserde man dran lengre vasta vin! 18 Baro Devel, mouk man gar čičeske gole te dell ap toute! Kre, te ladjenn pen i čilače! Yon mou djan tele oun merenn! Palle nay rakrenn le bouder gar, 19 kolla rhorhene, kay hi pre-phourde oun praasenn kolen, kay an o čačepen tardo hi. 20 Har baro hi tiro lačepen, miro Devel, kolenge, kay djivenn touha! Hakeneste sikreh tou, har lačo tou kolenge hal, kay rikrenn pen ap toute. 21 Tou khatreh len pash toute kol menshendar, kay čivenn pen khetne, te krenn le lenge čilačepen. Tou moukeh kek praasepen pral lende te vell. 22 Baro Devel, parkrau man pash toute. Tou sikral tiro baro lačepen ap mande, har homs har i foro, troul koleste boud lourde tarde his. 23 Me homs yaake dareno, te penom: “Mo Devel, tou kameh mandar bouder či te djinell!” Kova his gar yaake: Tou shounal man, har rovom ap toute. 24 Kamenn o baro Debles o tselo djiyestar, t'mer kay leskre han! Koon ap leste patsella, hi an leskro vast. Koon pes pre phourdell, ap koleste vell leskri rholi. 25 Avenn zoreles an t'maro dji, oun ma darenn, t'mer halauter, kay dikenn ap o baro Debleste. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.