Debleskri gili 30 - O Debleskro Lab 2024 (Sinte-Manouche)Miro Devel, tou dal man miro djipen pale 1 I gili o Davidestar, te givenn le ap kol bare divessa, kay o Debleskro kheer kerdo vas. 2 Me hadau tout, miro baro Devel, tou tserdal man pre, har me dour tele homs, oun moukal gar kolen pral mande te sal, kay mange čilačepen kaman. 3 Miro baro Devel, har dom gole ap toute, kral tou man sasto. 4 Baro Devel, tou lal miro djipen vin dran o merepen, te djom gar an o moulengro them. Tou dal man miro djipen pale. 5 Bashrenn o baro Debleske, t'mer, kay han leskro! Sharenn les, oun bistrenn gar, te hi lo o Devel. 6 I tikno tsiro kokres hi lo rhoyedo. O tselo djipen hi lo menge lačo. Rati vell o ropen dren, oun taysarlakro hi pale sapen koy. 7 Har mange mishto djas, penom: “Či nay vell, hoy nay krell mange čomone.” 8 Tou, baro Devel, hals mange lačo, oun kral man yaake zorelo har i baro bar. Ap yek kopo khatral tou tout mandar, oun man tapras i daar. 9 Ap toute, baro Devel, dom gole, ap toute, miro ray, rovom oun penom: 10 “Hoy hi tout miro merepastar, te merau? Te vom paskedo oun vom pale čik, nay sharau tout bouder gar, vitar gar nay rakrau pral tiro čačepen. 11 Shoun, baro Devel, oun ab mange lačo! Ab ap miri rig, miro baro Devel!” 12 Dran miro ropaskri gili kral tou mange i barhtyakro khelepen. Tou pandal mange ko gono tele, hoy miro ropaskro ripen his, oun čival barht har i ripen ap mande. 13 Yaake kamau te givap touke gilya, oun moukau gar tele, te sharap tout. Miro baro Devel, me kamau man pash toute te parkrell kanna oun hako tsiro. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.