Debleskri gili 29 - O Debleskro Lab 2024 (Sinte-Manouche)O Debleskro raylepen oun zoor vell diklo 1 I gili o Davidestar. 1 I gili o Davidestar. T'mer bolepangre, sharenn o baro Debles! Sharenn leskro raylepen oun leskri zoor! 2 Krenn leskro lab baro! Avenn oun vitsrenn t'men tele glan o baro Debleste, te vell lo an peskre shoukar oun kouč ripya! 3 O baro Debleskro rakepen vell shounlo pral i panya. Te dell o zorelo Devel gole, hi kova har koy bari gole, hoy dell o bolepen, te dell baro brishin. O baro Devel hi o ray pral i tsele bare panya. 4 Leskro rakepen hi pherdi zoor, oun sikrell havo baro ray yob hi. 5 O baro Debleskro rakepen phagella zorele rouka, ninna kol cedertikre rouka ap i berga Libanon. 6 Yob moukell len te stell har i terne groumya, I berga Libanon moukell lo te stell har i terni groumni stell, oun i berga Siryon har i terno divyo gouroum. 7 Te rakrell o baro Devel, dell yag karye dran o bolepen. 8 Te rakrell o baro Devel, trissell o moulo tato them. O baro Devel moukell te trissell o moulo tato them, hoy kharella Kadesh. 9 Te rakrell o baro Devel, anenn i vesheskre groumya pengre terne ap i phoub. Ninna nashrenn i rouka pengre patria an i vesha. An o Debleskro kheer dell hakeno gole: “Har baro hi o Devel!” 10 O baro Devel hi beshdo pral i panya. O baro Devel hi o baro ray hako tsireske. 11 O baro Devel dell peskre menshende zoor, ninna barht oun lačo koova. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.