Debleskri gili 28 - O Debleskro Lab 2024 (Sinte-Manouche)Miro Devel, le man vin dran i čilače vasta! 1 I gili o Davidestar. 1 I gili o Davidestar. Tou, baro Devel, hal mange har i baro zorelo bar, kay nay khatrau man. Ap toute dau me gole. Ma risse tire kanda mandar! Tou te shouneh gar, har gole dau, palle hom yaake har kolla, kay pash i moulende an o moulengro them djan. 2 Shoun ap miro ropen! Shoun, har ap toute gole dau! Dik ap mire vasta, hoy me pre-hidjrau pash tiro kheer, kay tou hal! 3 Ma kre mantsa har i čilačentsa oun kolentsa, kay krenn i vavarenge čilačepen, kay rakrenn lačes, oun an lengro dji hi čilačepen! 4 Kre lentsa pal kova, hoy yon kran, pal lengro čilačepen, hoy yon kran, pal kova, hoy yon pengre vastentsa kran! De len pale pal kova, hoy kran le i vavarenge! 5 Yon dikenn gar ap kova, hoy o baro Devel krell, vitar gar ap kova, hoy yob peskre vastentsa kras. Doleske vitsrell lo len ap i phoub, te nay stenn le bouder gar pre. 6 Sharedo vell o baro Devel, yob shounas miro ropen. 7 O baro Devel hi miri zoor, oun rikras peskro vast pral mande. Ap leste patsau miro tselo djiyeha. Oun yob vas ap miri rig. Kanna stell miro dji, oun hi barhteles, oun me kamau les sharell oun leske givell. 8 O baro Devel hi o zorelo ap i rig peskre menshendar. Oun o baro rayeske, hoy yob vi-rodas, hi lo har i baro zorelo kheer. 9 Ab ap i rig tire menshenge! Čip tiri zoor oun tiri barht ap mende, kay tiro ham! Ab hako tsiro har i bakrengro menge, kay dell yak ap peskre bakrende oun dell len lauter, hoy len hounte vell djipaske! |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.