Debleskri gili 27 - O Debleskro Lab 2024 (Sinte-Manouche)Miro Devel hi pash mande 1 I gili o Davidestar. 1 I gili o Davidestar. O baro Devel hi mange i momeli, oun yob hi kova, hoy man vin lella dran i vasta čilače menshendar. Kekestar hounte darap man. O baro Devel rikrell man an o djipen. Kekestar hounte trashap me. 2 Te venn i čilače ap mande har divye firhe, kay kamenn man te rhal, kolla, hoy les mange phares krenn oun mange čilačepen kamenn, palle hi yon kolla, kay nashrenn pengri zoor oun perenn. 3 Ninna te venn boud lourde troul mande trouyel, taprell miro dji kek daar. Ninna te djan le an o kourepen khatar mande, hom me pherdo patsepen ap miro baro Debleste. 4 Yek koova mangau miro baro Deblestar, kova kamaus me lestar, te nay ačoms an leskro kheer yaake rah har me djivau, te nay dikap o tselo tsiro leskro shoukapen, oun nay poučap pal leskro kamlepen an leskro kheer. 5 An o čilačo tsiro lell lo man an peskro kheer. Ava, an peskro kheer khatrell lo man, pral ap i baro bar hidjrell lo man. 6 Oun kanna hadell pes miro shero pre pral kolende, kay troul mande hi oun mange čilačepen kamenn, O baro Debleske kamau me firhen te rhačrell, oun dau gole i barhtyatar oun parkrau man pash leste an leskro kheer; i gipah oun bashepah sharau les. 7 Shoun, baro Devel! Ap toute dau me gole. Ab mange lačes oun shoun miro mangepen! 8 Tire laba van mange an o shero, hoy tou penal: “Avenn pash mande!” Doleske vau pash toute. 9 Ma dja touke mandar! Biče man, tiro boudepaskres, gar toutar krik an tiri rholi! Tou hal kova, kay vas mange ap i rig hako tsiro. Miro Devel, tou hal kova, kay man vin lell. Ma mouk man! Ma de man pre! 10 Te moukenn man miro dad oun miri day, leh tou, baro Devel, man pash toute pre. 11 Baro Devel, sike man tiro drom! Oun an man ap o čačo drom, te hounte rikrenn kolla pengro mouy, kay mange čilačepen kamenna. 12 Ma de man an lengre vasta! Dik, menshe hi koy, kay rhorhepen ap mande pre anan, oun ladjenn pen gar, te denn le man trad. 13 Me djinau, te dikau me o lačepen o baro Deblestar an kava djipen. 14 Rike tout ap o baro Debleste tiro tselo djiyeha! Ab zoreles, oun ma traash, oun rike tout ap o baro Debleste! |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.