Debleskri gili 25 - O Debleskro Lab 2024 (Sinte-Manouche)Miro Devel, biste miri doosh! 1 I gili o Davidestar. 1 I gili o Davidestar. Baro Devel, miro mangepah vau pash toute. 2 Ap toute rikrau man, miro Devel. Mouk man gar čičeske ap toute te dikell, te nay san kolla pral mande, kay kamenn mange čilačepen. 3 Kek, kay pes ap toute rikrell, hounte ladjell pes. Kolla, kay phoukrenn ap toute čičeske, hounte ladjenn pen. 4 Baro Devel, sike man tiro drom, oun hoy tou mandar kameh! 5 Sike mande, har te djivap miro djipen an tiro čačepen! Tou hal miro Devel, kay rikrell man! Hako dives dikau ap toute. 6 Miro baro Devel, ma biste tiro kamlepen oun tiro lačepen, hoy hako tsiro ap tire menshende sikral. 7 Biste miri doosh, hoy ap mande lom, har terno homs, oun miro čilačo koova! Kre mange tiro dji pre, miro baro Devel! 8 Lačo oun čačo hi o baro Devel. Doleske sikrell lo kolen, kay doosh ap pende lan, o čačo drom. 9 Kolen, kay tele rikedo hi, anell lo ap o čačo drom, oun sikrell lende, hoy lo lendar kamella. 10 I tsele dromma hi lačo oun čačo, kay o baro Devel kolen anell, kay rikrenn pen ap leskre laba oun krenn, hoy yob lenge penell. 11 Baro Devel, kre tiro lab baro, oun le miri doosh mandar krik, hoy yaake bares hi! 12 Hoy hi ko morsheha, kay djivell o baro Debleha? Koleste sikrell lo havo drom yob te djal. 13 Kova djivella an i barht, oun leskre čavenge hi o them. 14 O baro Devel hi o maal kolenge, kay djivenn leha, oun lende sikrell lo, te hi lo lengro Devel oun yon peskre menshe. 15 Mire yaka dikenn hako tsiro ap o baro Debleste, yob lell mire pire dran i netsa vin, kay yon dren pandle hi. 16 Risse tout pash mande, oun kre tiro dji mange pre, me hom yaake mouklo oun kokres. 17 I daar an miro dji hi baro. Le man vin dran miri bibarht! 18 Dik ap miro pharo djipen, oun har djoungeles mange djala, oun biste miri tseli doosh! 19 Dik, har boud kolla hi, kay kamenn mange čilačepen, oun havi bari rholyah yon pen ap mande rhoyrenna! 20 Rike tiro vast pral miro djipen, oun le man dran lengre vasta vin! Mouk man gar čičeske pash toute te vell oun ap toute te dikell! 21 Me rikrau man ap toute miro tselo djiyestar. Doleske mouk man te djivap miro djipen an djoudjepen oun čačepen. 22 Miro Devel, le o Israel vin dran kava tselo parepen, hoy ap leste hi! |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.