Debleskri gili 24 - O Debleskro Lab 2024 (Sinte-Manouche)O baro Devel vell an peskro kheer 1 I gili o Davidestar. 1 I gili o Davidestar. O baro Debleske hi i phoub oun lauter, hoy koy pre hi, ava, i tseli phoub oun kolla, kay kote djivenna. 2 Yob kras lat oun čivas lat pral o baro pani, oun rikras lat zoreles pral i panya. 3 Koon hi kova, kay ap o baro Debleskri berga nay djal? Koon hi kova, kay an leskro kheer nay tardo ačella? 4 Kava, ap koleskre vasta kek doosh hi, oun koles i djoudjo dji hi. Kova, kay djivell gar peskro djipen ap rhorhepen, oun dell pes gar rhorheni sovel. 5 Savo lell barht o baro Deblestar. Leskro Devel hi ap leskri rig oun dell les čačepen. 6 Yaake hi i menshe, kay pal leste poučenna, oun pash leste venna. Yon hi i čače čave o Yakobestar. 7 Krenn i bare voudya bourhles pre! Ava, krenn kol phoure voudya bares pre, te nay djal o baro ray dren, kones o tselo raylepen hi. 8 Koon hi kava baro ray, kones o tselo raylepen hi? Kova hi o baro Devel, ko zorelo kourepaskro, ava, o baro Devel hi zorelo an o kourepen. 9 Krenn i bare voudya bourhles pre ava, krenn kol phoure voudya bares pre, te nay djal o baro ray dren, kones o tselo raylepen hi! 10 Koon hi kava baro ray, kones o tselo raylepen hi? Kova hi o baro Devel, ko ray pral o bolepen oun i phoub. Yob hi o baro ray, kones o tselo raylepen hi. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.