Debleskri gili 23 - O Debleskro Lab 2024 (Sinte-Manouche)O lačo bakrengro 1 I gili o Davidestar. 1 I gili o Davidestar. O baro Devel dell yak ap mande har i bakrengro dell yak ap peskre bakre. Man hi lauter, hoy man hounte vell djipaske. 2 Yob moukell man tele te čivell ap i phoub pherdo zenlepen, oun anell man pash lačo pani. 3 Yob dell miro djipen nevi zoor. Yob anell man ap o čačo drom, yaake har yob peskro lab koy pre das. 4 Ninna te nashau me mashkral i tamli tala, darau me glan kek bibarht. Tou hal pash mande. Tiro kashteha aneh tou man pale, oun rikreh i divye firhen mandar krik, yaake hounte trashap gar. 5 Glan i yaka kolendar, hoy mange čilačepen kamenn, čiveh tou mange lačo rhapen pre. Miro shero makeh o djeteha, hoy mishto soungella. Miro khoro nashella pral. 6 Čačepah, tiro lačepen djal mange palla, oun hako dives kreh tou tiro dji mange pre, yaake rah, har me djivau. Oun me ačau an o baro Debleskro kheer hako tsiro. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.