Debleskri gili 22 - O Debleskro Lab 2024 (Sinte-Manouche)Mo Devel, hoske moukal tou man? 1 I gili o rayeske pral i gipangre, te givell har koy gili I vesheskri groumni, hoy sik ap o dives tradedo vella. O David kras kay gili. 2 Mo Devel, mo Devel, hoske moukal tou man? Me dau gole ap toute, oun tou veh gar ap miri rig. Hoske ačeh dour mandar? 3 Mo Devel, ap o dives dau ap toute gole, oun tou shouneh man gar, ninna rati kharau tout, oun hatsau kek sopen. 4 Tou hal ko yek čačo Devel, oun hal beshdo ap tiri rayeskri beshepaskri, oun o Israel givell touke gilya. 5 Ap toute dikan mare phoure, oun tou val ap lengri rig. 6 Ap toute dan le gole, oun tou lal len vin. Ap toute dikan le, oun tou moukal len gar kokres. 7 I kirmo hom me oun bouder kek mensho. I menshe praasenn man, oun dikenn tele ap mande. 8 Hakeno, kay dikell man, sal pral mande, rissrell peskre yaka, oun čivell peskro shero ap i rig oun penell: 9 “De gole ap o baro Debleste! Te kamell lo tout, palle lell lo tout vin oun rikrell peskro vast pral toute.” 10 Tou, mo Devel hals kova, kay kras te vom boldo, tou moukal man kek daryah te sovell ap o beč miri datar. 11 Foun tiknes pre, deh tou yak ap mande, Yaake rah har djivau, hal tou miro Devel. 12 Ač gar dour mandar, man hi daar, oun kek hi ap miri rig tardo. 13 Boud gourma hi troul mande, ava, divye zorele gourma pandan man dren. 14 Pengre bare mouya krenn le pre, oun denn bari gole ap mande har i levo glan peskro rhapen. 15 Miri zoor hi vin čoredo har pani, mire tsele kokale rikrenn bouder gar khetne, Miro dji nashras peskri zoor, har i momeli hoy tele rhačras. 16 Miri meen hi trouk. Ninna miro čip hi bouder gar sapeno, oun tou čival man an o merepaskri čik. 17 Čilače menshe čivan pen khetne oun djan troul mande, har djoukle, kay moukenn man gar vin te djal. Yon denn čourye an mire vasta oun an mire pire. 18 Me hom yaake sano, te nay dikenn le mire tsele kokale. Oun kol čilače dikenn ap mande, oun lenn man an i yak. 19 Yon lenn penge mire koola oun khelenn vin, koon miri plaashka lell. 20 Ač gar dour mandar, mo baro Devel! Tou, miri zoor, ab sik ap miri rig! 21 Le man vin, te dell man o rharo gar moulo, te rhan kol djoukle gar miro djipen! 22 Tserde man vin dran o leveskro mouy! Oun le man krik glan i shinga divye gourmendar! Tou shounal man. 23 Toutar kamau me te rakrell pash mire phralende. Kote, kay venn le khetne, kamau me tout te sharell. 24 T'mer, kay o baro Debles an-mangenna, sharenn les! T'mer lauter dran o kheer Yakob, hadenn les pre! Oun darenn lestar, t'mer lauter dran o kheer Israel! 25 Yob dikas gar krik o čorvelestar oun leskre douka, oun khatras gar peskro mouy lestar, Na-a, har yob ap leste gole das, shounas lo les. 26 Tout kamau me te sharell, kote, kay boud khetne venna. Glan kolende, kay tout an-mangenna, kamau me touke te dell, hoy sovel dom. 27 Mou rhan i čorvele oun venn čalo! Oun kolla, kay ap o baro Debleste gole denna, mou sharenn les! Lenge te vell i djipen, hoy gar pre-herella! 28 Mou rodenn i menshe ap i tseli phoub o baro Debles, oun venn pash leste! Mou mangenn le les an, an hako them! 29 O baro Devel hi o ray pral i tseli phoub. Ava, o baro ray hi lo pral i tsele themma. 30 Ninna i bravele ap kay phoub, kolen hako tsiro boudeder hi har doha rhapaske, hounte vitsrenn pen tele glan leste. Ninna hakeno, kay meras oun pale čik vas, hounte perell ap i čanga glan leste. 31 Ninna kolla, kay bolde venna, venn leske koy. Oun yon rakrenn ap pengre čavende oun čavengre čavende o baro Deblestar. 32 Ko čačo koova, hoy yob kras, penenn le doureder ap kolende, kay bolde venna. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.